(لاہور نیوز) وزیراعلیٰ پنجاب مریم نواز شریف کے وژن کے تحت چیئرپرسن چائلڈ پروٹیکشن بیورو سارہ احمد کی کاوشوں سے سرگودھا میں نئے چائلڈ پروٹیکشن انسٹیٹیوٹ کا افتتاح صوبائی وزیر کمیونیکیشن اینڈ ورکس ملک صہیب احمد بھرتھ نے کر دیا۔

اس موقع پر چیئرپرسن سارہ احمد نے کہا کہ وزیراعلیٰ پنجاب مریم نواز کی مکمل سپورٹ سے سرگودھا میں چائلڈ پروٹیکشن انسٹیٹیوٹ کا باقاعدہ آغاز ممکن ہوا۔ انہوں نے بتایا کہ ادارے میں بے سہارا، لاوارث اور استحصال کا شکار بچوں کو رہائشی سہولیات کے ساتھ قانونی معاونت اور نفسیاتی کونسلنگ فراہم کی جائے گی، جبکہ انسٹیٹیوٹ میں 100 بچوں کے لیے رہائش کی گنجائش موجود ہے۔

سارہ احمد نے مزید کہا کہ سرگودھا میں بچوں کے حقوق کے تحفظ اور فلاح و بہبود کے لیے عوامی آگاہی مہم بھی چلائی جائے گی اور چائلڈ پروٹیکشن بیورو کا دائرہ کار پنجاب کے تمام اضلاع تک پھیلایا جا رہا ہے۔ انہوں نے ملک میں پہلی مرتبہ پنجاب میں چائلڈ پروٹیکشن پالیسی کی منظوری پر وزیراعلیٰ پنجاب مریم نواز شریف کا شکریہ ادا کیا۔

تقریب کے دوران بچوں نے خوبصورت ٹیبلو پیش کیا۔ بعد ازاں صوبائی وزیر ملک صہیب احمد بھرتھ اور چیئرپرسن سارہ احمد نے انسٹیٹیوٹ کے مختلف سیکشنز کا دورہ کیا اور بچوں سے ملاقات کے دوران ان کے ساتھ کیک بھی کاٹا۔

صوبائی وزیر ملک صہیب احمد بھرتھ نے سرگودھا میں چائلڈ پروٹیکشن انسٹیٹیوٹ کے قیام پر چیئرپرسن سارہ احمد کی کوششوں کو سراہا۔

تقریب میں ممبران صوبائی اسمبلی پنجاب مہوش سلطانہ، صفیہ سعید، احمد لغاری، صفدر حسین ساہی، رئیس نبیل، چائلڈ رائٹس ایکٹیوسٹ افتخار مبارک، ایڈیشنل سیکرٹری ہوم اسما اعجاز، ڈپٹی کمشنر سرگودھا، ڈائریکٹر جنرل چائلڈ پروٹیکشن بیورو راؤ ندیم اختر، ڈائریکٹر ایڈمن وقار عظیم اور مختلف محکموں کے نمائندوں نے شرکت کی۔

Follow Lahore News on X

Install our App