(لاہور نیوز) وزیراعلیٰ پنجاب مریم نواز شریف نے باسکٹ بال کے عالمی دن پر اپنے پیغام میں کھیلوں اور خاص طور پر باسکٹ بال کے فروغ کیلئے حکومتی عزم کا اظہار کیا ہے۔

وزیراعلیٰ مریم نوازشریف نے کھلاڑیوں کی حوصلہ افزائی کی اور پنجاب میں عالمی معیار کے سپورٹس انفراسٹرکچر کی تعمیر کے عزم کا اعادہ کیا تاکہ کھلاڑیوں کو بہترین سہولیات ملیں اور صوبے کا نام روشن ہو۔

مریم نواز شریف نے کہا ہے کہ کھلاڑیوں کی حوصلہ افزائی کیلئے میڈلسٹ کھلاڑیوں کو انعامات سے نوازا گیا، صوبائی وزیر کھیل پنجاب ملک فیصل ایوب کھوکھر نے 35ویں نیشنل گیمز میں 37 سال بعد پنجاب کی شاندار فتح پر 126 میڈلسٹ کھلاڑیوں کے اعزاز میں خصوصی تقریب کا انعقاد کیا، جس میں  126 میڈلسٹ کھلاڑیوں میں کروڑوں روپے کے انعامات تقسیم کئے۔

 وزیراعلیٰ نے کہا کہ پنجاب میں عالمی معیار کے سپورٹس کمپلیکس تعمیر کیے جا رہے ہیں اور کھلاڑیوں کو انڈوومنٹ فنڈ کے ذریعے مزید انعامات دئیے جائیں گے، نوجوانوں میں ٹیم ورک، مسابقت اور برداشت پیدا کرنے کے لئے سپورٹس اہم کردار ادا کرتے ہیں، کھیل ہمیں نظم و ضبط سکھاتے ہیں۔

 انہوں نے کہا کہ پنجاب میں کھیلوں کے فروغ کے لئے ''کھیلتا پنجاب'' پروگرام تشکیل دیا گیا ہے، پنجاب بھر میں گراؤنڈ اور جمنیزیم کی تعمیر وبحالی کیلئے شعبہ تعمیر وبحالی قائم کر رہے ہیں، نوجوانوں کیلئے 300 گراؤنڈ اور سپورٹس کمپلیکس بنانے کیلئے پرعزم ہیں۔

مریم نواز نے مزید کہا کہ سپورٹس انڈوومنٹ فنڈ بڑھا کر 2 سے 4 ارب روپے کر دیا ہے،سپورٹس فیسٹیول بحال اور ہر یونین کونسل میں کھیلوں کے مقابلے اور پنجاب لیگ شروع کرینگے، سپورٹس ایڈوائزری کونسل میں 10 یونیورسٹی کے طلبہ بھی ممبر ہوں گے، کھلاڑیوں کی ٹریننگ کیلئے انٹرنیشنل کوچ بھی لے کر آئیں گے۔

Follow Lahore News on Facebook

Install our App