سال کے آغاز میں پاکستان نے آئی سی سی چیمپئنز ٹرافی 2025 کی میزبانی کی، جو 1996 کے ورلڈ کپ کے بعد پہلا موقع تھا جب پاکستان نے کسی آئی سی سی ایونٹ کی میزبانی کی، تاہم، ہوم گراؤنڈ پر کھیلتے ہوئے پاکستان ٹیم محض چار دن کی مہمان ثابت ہوئی، اپنے ابتدائی دونوں میچز میں شکست کے بعد پاکستان ٹورنامنٹ سے سب سے پہلے باہر ہو گیا۔

اس کے بعد نیوزی لینڈ کے ساتھ سیریز نے پاکستان کرکٹ کی مشکلات میں مزید اضافہ کر دیا، جہاں ٹی ٹوئنٹی سیریز میں پاکستان کو ایک چار جبکہ ون ڈے سیریز میں 3-0 سے شکست کا سامنا کرنا پڑا۔

کپتانی کے حوالے سے بھی یہ سال پاکستان کرکٹ کے لیے خاصا غیر یقینی سال رہا، محمد رضوان کو ون ڈے اور ٹی ٹوئنٹی دونوں فارمیٹس کی قیادت سے ہاتھ دھونا پڑا، ٹی ٹوئنٹی ٹیم کی ذمہ داری سلمان علی آغا کو سونپی گئی جبکہ ون ڈے ٹیم کی قیادت شاہین شاہ آفریدی کے سپرد کر دی گئی۔

تاہم، ٹی ٹوئنٹی کرکٹ پاکستان کے لیے اس سال امید کی کرن ثابت ہوئی، ہوم گراؤنڈ پر پاکستان ٹیم ناقابلِ شکست رہی اور ایشیا کپ 2025 کا فائنل کھیلنے کا اعزاز بھی حاصل کیا۔

ایشیا کپ 2025 کے فائنل میں پاکستان کو روایتی حریف بھارت کے ہاتھوں شکست سے دو چار ہونا پڑا، تاہم جونیئر کرکٹ میں پاکستان نے اپنی صلاحیتوں کا لوہا منوایا اور رائزنگ اسٹار ایشیا کپ کا ٹائٹل اپنے نام کی۔

ٹیسٹ کرکٹ کی اگر بات کی جائے تو پاکستان کرکٹ ٹیم کی پر فارمنس مایوس کن رہی, پاکستان ٹیم نے 5 ٹیسٹ میچز جس میں سے 2 میں کامیابی جبکہ 3 میں شکست کا سامنا ہوا، ون ڈے کرکٹ کے حوالے سے بھی یہ سال پاکستان کے لیے زیادہ یادگار ثابت نہ ہو سکا، جہاں 17 میچز میں سے صرف سات فتوحات حاصل ہوئیں۔

اس کے برعکس ٹی ٹوئنٹی کرکٹ میں پاکستان کی کارکردگی خاصی بہتر رہی اور 34 میچز میں سے اکیس میں کامیابی حاصل کی گئی، شائقین کرکٹ کا کہنا تھا کہ یہ سال پاکستان کرکٹ کے لئے کچھ اچھا سال ثابت نہیں ہوا۔ اگلے سال بہترین کارکردگی کی توقع ہے۔

انفرادی کارکردگی پر نظر ڈالیں تو ٹیسٹ کپتان شان مسعود نے ٹیسٹ کرکٹ میں 442 رنزبنا کر نمایاں کارکردگی دکھائی، جبکہ سلمان علی آغا نے 830 رنز بنا کر ان ڈے اورصاحبزادہ فرحان ٹی ٹونٹی میں 771 رنز بنا کر اپنی بیٹنگ سے سب کو متاثر کیا۔