(لاہور نیوز) سی سی ڈی پولیس کی مختلف علاقوں میں مبینہ مقابلوں کی کارروائیوں میں تین زیر حراست ملزمان ہلاک ہو گئے۔
ان ملزمان میں محمد فرید، محسن علی اور آصف جاوید شامل ہیں، پولیس نے بتایا کہ یہ ملزمان منشیات فروش تھے اور دیگر سنگین وارداتوں میں بھی ملوث تھے۔
سی سی ڈی کی ٹیم محسن علی کو کاہنہ اور ماڈل ٹاؤن میں ریکوری کیلئے لے کر گئی تھی، اس دوران، ملزمان کے ساتھیوں نے پولیس پارٹی پر فائرنگ کر دی، فائرنگ کے تبادلے میں محسن علی اور ایک اور زیر حراست ملزم موقع پر ہلاک ہو گئے، پولیس کا کہنا ہے کہ یہ فائرنگ اپنے ساتھیوں کی طرف سے کی گئی تھی اور اندھیرے کا فائدہ اٹھاتے ہوئے باقی ملزمان موقع سے فرار ہونے میں کامیاب ہو گئے۔
رات گئے سی سی ڈی کی ٹیم کو گرین ٹاؤن میں بھی ایک مبینہ مقابلے کا سامنا کرنا پڑا، جہاں ایک اور زیر حراست ملزم آصف جاوید مارا گیا، پولیس نے بتایا کہ ہلاک ہونے والے تینوں ملزمان منشیات فروش تھے اور ان کے خلاف مختلف نوعیت کی وارداتوں کی تحقیقات بھی جاری ہیں۔
سی سی ڈی پولیس نے اس کارروائی کے بعد ہلاک ملزمان کی لاشیں پوسٹ مارٹم کیلئے مردہ خانہ منتقل کر دیں، پولیس نے مزید بتایا کہ ملزمان کے فرار ہونے والے ساتھیوں کی گرفتاری کیلئے ایک ٹیم تشکیل دے دی گئی ہے تاکہ ان کے خلاف بھی کارروائی کی جا سکے۔
