(لاہور نیوز) وزیراعلیٰ پنجاب مریم نواز شریف کی ہدایت پر صوبے میں صنعتی آلودگی کے خلاف بڑے پیمانے پر اقدامات جاری ہیں۔

پنجاب میں انڈسٹریل ری زوننگ اور ایمیشنز مینجمنٹ کا جدید ڈیجیٹل نظام مکمل طور پر فعال ہو گیا ہے، محکمہ ماحولیات کے مطابق ای پی اے نے صوبے بھر میں 7,889 صنعتی یونٹس کو ای-میپ کیا جبکہ ڈرون سرویلنس کے دوران خلاف ورزی پر 2,654 یونٹس کو سیل کیا گیا،ایکو واچ سسٹم کے تحت 949 انسپکٹرلیس انسپکشنز کی گئیں اور قواعد کی خلاف ورزی پر مجموعی طور پر 224 ملین روپے جرمانے عائد کئے گئے۔

ادھر بھٹوں کے شعبے میں بھی بڑے پیمانے پر کارروائیاں سامنے آئیں جہاں 7,891 بھٹوں کو جیو ٹیگ کیا گیا، 2,312 بھٹے سیل کئے گئے، جبکہ 2,027 کو مکمل طور پر مسمار کر دیا گیا، بھٹہ مالکان پر مجموعی طور پر 245 ملین روپے جرمانہ عائد کیا گیا، سموگ کنٹرول آپریشن کے دوران 82 پائرو لائسز یونٹس مسمار کئے گئے، 30 کو سیل کیا گیا جبکہ 28 ٹن ٹائرز قبضے میں لے کر تلف کئے گئے۔

حکومتی ترجمان  نے بتایا کہ وزیراعلیٰ مریم نواز شریف کی زیرو ٹالرنس پالیسی نے صنعتی آلودگی کے خلاف دہائیوں پرانی بے ضابطگیوں کا خاتمہ کر دیا ہے، جبکہ ڈرون سرویلنس اور ڈیجیٹل مانیٹرنگ نے انڈسٹری کے ماحول دوست نظام کو یقینی بنانے میں اہم کردار ادا کیا ہے۔

ای سی ایس ریٹروفٹس اور سافٹ لون سکیم کے تحت پنجاب کی 96 فیصد صنعتوں میں ایمیشن کنٹرول سسٹمز نصب کر دیئے گئے ہیں، سیل شدہ فیکٹریوں اور بھٹوں کی 24/7 ڈیجیٹل نگرانی کی جا رہی ہے اور بغیر مکمل کمپلائنس کے کسی بھی یونٹ کو دوبارہ چلانے کی اجازت نہیں دی جا رہی۔

لاہور، فیصل آباد، گوجرانوالہ اور سیالکوٹ میں انڈسٹریل ری زوننگ کے عمل میں تیزی لائی گئی ہے اور فیکٹریوں کو آبادی سے باہر صنعتی زونز میں منتقل کیا جا رہا ہے، سیالکوٹ میں 20 سال بعد پہلی مرتبہ 80 فیکٹریاں باقاعدہ طور پر ٹینریز میں منتقل کی گئی ہیں۔

دوسری جانب صوبے کے سپر سیڈر پروگرام میں بھی نمایاں پیش رفت رپورٹ ہوئی ہے، پنجاب میں سپر سیڈرز کی کل تعداد 4,765 تک پہنچ چکی ہے جن میں سے 4,036 اس وقت فیلڈ میں سرگرم عمل ہیں، ان سپر سیڈرز کے ذریعے 6,85,764 ایکڑ رقبے پر گندم کی کاشت مکمل کی گئی اور 95 فیصد رقبہ جلنے سے محفوظ رہا۔

سینئر صوبائی وزیر مریم اورنگزیب نے کہا کہ صنعتی آلودگی کے خلاف یہ تاریخی کریک ڈاؤن پنجاب کو سموگ فری بنانے کی بنیاد رکھ رہا ہے اور حکومت کی یہ حکمتِ عملی ملک کے دیگر صوبوں کیلئے رول ماڈل ثابت ہو سکتی ہے۔

Subscribe Lahore News on YouTube

Install our App