15 Nov 2025
(لاہور نیوز) بابا گرو نانک کے جنم دن کی یاترا کیلئے بھارت سے آنے والی سکھ یاتریوں میں شامل 48 سالہ سربجیت کور نے اسلام قبول کر کے ایک پاکستانی شہری ناصر حسین سے شادی کر لی۔
سربجیت کور، جنہوں نے اسلام قبول کرنے کے بعد اپنا اسلامی نام نور رکھا ہے، نے 5 نومبر کو ضلع شیخوپورہ کے فاروق آباد کے رہائشی پاکستانی شہری ناصر حسین سے نکاح کیا، نکاح میں 10 ہزار روپے حق مہر درج کئے گئے تھے، جو ادا کیا جا چکا ہے۔
سربجیت کور 4 نومبر کو بھارتی یاتریوں کے ساتھ پاکستان آئی تھیں، تاہم 13 نومبر کو جب بھارتی یاتری پاکستان واپس جا رہے تھے، وہ ان کے ہمراہ نہیں تھیں اور ان کا ویزہ بھی اسی دن ختم ہو گیا تھا، اس کے بعد انہیں لاپتہ قرار دے دیا گیا اور ان کی تلاش شروع کر دی گئی تھی۔
