(لاہور نیوز) پنجاب حکومت کی جانب سے آئی ٹی گریجویٹس کیلئے نئے ’’آئی ٹی انٹرن شپ پروگرام‘‘ کا آغاز کر دیا گیا، جس کے ذریعے سٹوڈنٹس کو 50 ہزار روپے ماہانہ کمانے کا موقع ملے گا۔
پنجاب کی وزیرِ اعلیٰ مریم نواز کی ہدایت پر آئی ٹی گریجویٹس کے لیے نیا "آئی ٹی انٹرن شپ پروگرام” شروع کر دیا گیا، یہ پروگرام صوبے کے نوجوانوں کو جدید ٹیکنالوجی کی تعلیم اور باعزت روزگار کے مواقع فراہم کرنے کے لیے متعارف کرایا گیا ہے۔
پروگرام کے تحت آئی ٹی اور کمپیوٹر سائنس کے گریجویٹس کو جدید مارکیٹ اسکلز اور ٹیکنالوجیز میں تربیت دی جائے گی جبکہ انٹرنز کو ماہانہ 50 ہزار روپے وظیفہ بھی دیا جائے گا۔
اہلیت کیلئے امیدواروں کے پاس درج ذیل شرائط ہونا ضروری ہیں، آئی ٹی یا کمپیوٹر سائنس کی ڈگری گزشتہ چار سال کے اندر مکمل کی گئی ہو اور امیدوار کا پنجاب ڈومیسائل ہو جبکہ ا سکے علاوہ شناختی کارڈ بھی درست اور قابلِ تصدیق ہو۔
