وزیراعلیٰ مریم نواز شریف نے چینی وفد میں خواتین کو دیکھ کر خوشی کا اظہار کیا اور کہا کہ برازیل روانگی سے قبل چینی وفد سے ملاقات بے حد اہمیت کی حامل ہے، پنجاب میں سرمایہ کاری کا بہترین پوٹینشل موجود ہے۔

مریم نواز شریف کا کہنا تھا کہ پنجاب میں پہلی مرتبہ زیروٹائم ٹو سٹارٹ پالیسی متعارف کرائی گئی ہے، زیروٹائم ٹو سٹارٹ پالیسی متعارف کرانے کا مقصد سرمایہ کاروں کی بھرپورمعاونت اور حوصلہ افزائی ہے، پنجاب سرمایہ کاری کے مواقع کے لحاظ سے بہترین دور سے گزررہا ہے۔

ان کا یہ بھی کہنا تھا کہ پنجاب کے انڈسٹریل زون اور انڈسٹریل پارک سرمایہ کاری کے لئے بہترین پوٹینشل رکھتے ہیں، سرمایہ کاروں کے لئے ٹیکس ہالی ڈے اور ڈیوٹی امپورٹ ریلیف بھی دیا جائے گا، انفراسٹرکچر، آئی ٹی سیکٹر اور میڈیکل ٹورازم کے شعبے غیر ملکی سرمایہ کاری کے لئے بہترین ہیں۔

انہوں نے بتایا کہ گزشتہ سال دورہ چین کے بعد میڈیکل اور دیگر شعبوں میں جدت متعارف کرا رہے ہیں، پنجاب میں رئیل اسٹیٹ انفراسٹرکچر سرمایہ کو جلد منافع میں بدل سکتا ہے، روڈا کا پراجیکٹ انفراسٹرکچر کے لحاظ سے ایک مثال ہوگا، پنجاب میں پہلی مرتبہ 10ماہ میں ایک لاکھ سے زائد گھر بنا کر مثال قائم کر دی۔

مریم نواز شریف نے کہا کہ ٹورازم میں ترقی کی وجہ سے سیاحوں کے لئے مزید معیاری ہوٹلوں کی ضرورت محسوس کی جارہی ہے، پنجاب میں پہلی مرتبہ گلاس ٹرین اور ہائی سپیڈ ٹرین متعارف کرانے جارہے ہیں، سب سے بڑے میڈیکل ڈسٹرکٹ کے قیام کے لئے بہت بڑا خطہ مختص کیا گیا ہے، پنجاب میں بزنس آن لائن ہے، فائل اور پیپر نہیں، آج اپلائی کریں اور کل سے شروع کریں۔

اس موقع پر مختلف چینی کمپنیوں کے اعلیٰ عہدیداروں نے تعارف کرایا اور پنجاب کے مختلف سیکٹرز میں سرمایہ کاری کے لئے دلچسپی کا اظہار کیا۔