(لاہور نیوز) پنجاب سیف سٹیز اتھارٹی کی جانب سے صوبہ بھر میں ماحولیاتی آلودگی پھیلانے والے عناصر کیخلاف سخت کریک ڈاؤن جاری ہے۔
سموگ کے تدارک کیلئے سیف سٹی کی جانب سے اہم شاہراؤں پر جدید کیمروں اور ڈرونز سے سرویلنس کی جارہی ہے۔
ترجمان سیف سٹی کے مطابق اکتوبر کے مہینے میں آلودگی پھیلانے والے 6 ہزار سے زائد عناصر کے حوالے سے متعلقہ اداروں کو رپورٹس بھیجی گئیں۔ اس کے علاوہ دھواں چھوڑنے والی 2 ہزار 500 سے زائد گاڑیوں کو چالان جاری کیے گئے۔ ترجمان نے بتایا کہ 148 مقامات پر فصلوں کی باقیات اور کوڑا جلانے والوں کی رپورٹ متعلقہ محکموں کو کارروائی کیلئے بھجوائی گئی۔
ترجمان نے بتایا کہ کیمروں میں آگ لگانے اور دھواں چھوڑتی گاڑیاں نظر آنے پر فیلڈ فورس کو آگاہ کر رہے ہیں ۔ شاہراؤں پر دھول، مٹی، ریت اور دیگر گندگی پھیلانے والی گاڑیوں کے خلاف بھی کارروائی عمل میں لائی جار ہی ہے۔
پنجاب سیف سٹیز اتھارٹی کے ترجمان نے اپیل کی ہے کہ سموگ کی آفت سے نجات کیلئے شہری بھی اپنا کردار ادا کریں۔
