(لاہور نیوز) وزیر اطلاعات پنجاب عظمیٰ بخاری نے کہا ہے کہ ٹی ایل پی دہشت گرد اور تحریک فساد ایک سکے کے دو رخ ہیں، حکومت نے ٹی ایل پی کے زیر اثر 330 مساجد کا انتظام خود سنبھال لیا ہے، تمام مساجد کھلی ہیں اور نماز کیلئے استعمال ہو رہی ہیں۔

عظمیٰ بخاری نے بتایا کہ سعد رضوی کے نام پر95 بینک اکاؤنٹ نکلے ہیں، یہ تمام اکاؤنٹ اور سعد رضوی کی تمام منقولہ اور غیر منقولہ جائیداد منجمد کر دی گئی ہے۔ 

لاہور میں پریس کانفرنس کرتے ہوئے عظمیٰ بخاری نے کہا کہ حکومت نے  کوئی مسجد کسی طور پر  بھی مسمار نہیں کی، نہ کی ہے اور نہ ہی کوئی مسمار کی جائے گی۔ ایسے  شیطانی و خرافاتی آئیڈیاز ٹی ایل پی کے لوگوں کے  ذہن میں آتے ہیں۔  ٹی ایل پی کے زیر اثر مساجد  اور  مدارس کا نظم و نسق محکمہ اوقاف کے زیر انتظام کیا جا رہا ہے۔

 وزیر اطلاعات عظمیٰ بخاری نے کہا کہ کسی فرقہ، جماعت یا گروہ کے خلاف ایکشن نہیں، دہشت گرد سوچ کے خلاف ایکشن ہے، ٹی ایل پی کی مساجد حکومتی تحویل میں لی جا چکی ہیں اور 223 مدارس کی جیو ٹیگنگ کرلی گئی ہے، ٹی ایل پی کے 6 مدارس حکومتی زمین پر بنائے گئے جس کا کوئی ریکارڈ نہیں ہے۔

عظمیٰ بخاری نے کہا ہے کہ سعد رضوی اور اس کے بھائی کو ٹریس کیا جا رہا ہے بہت جلد وہ قانون کی گرفت میں ہوں گے، خود بھاگے ہوئے ہیں، لوگوں سے کہتے ہیں باہر نکل آئیں اور آگ لگائیں، وفاقی حکومت کو پنجاب کابینہ کا فیصلہ بھجوا دیا ہے اور امید ہے ایک دو روز میں ٹی ایل پی پر پابندی لگ جائے گی۔

عظمیٰ بخاری نے مزید کہا کہ ہم نہیں چاہتے کہ ملک میں پریشر گروپ بنیں، تمام حملوں کی باقاعدہ فوٹیجز موجود ہیں، شاہدرہ میں بھی پولیس اہلکار پر تشدد کی ویڈیو موجود ہے، سیاستدانوں اور صحافیوں کو دھمکی دینے کیلئے آرگنائزڈ سیل بنایا گیا، قبر کا استعمال کر کے چندہ اکھٹا کرنے اور اشتعال انگیزی کی اجازت نہیں دیں گے، بابا جی کی قبر کہیں منتقل نہیں کر رہے، یہ ہماری پالیسی نہیں۔

عظمیٰ بخاری  نے کہا کہ حکومت نے 330 مساجد کا انتظام سنبھال لیا ہے، تمام مساجد کھلی ہیں اور نماز کیلئے استعمال ہو رہی ہیں، اس مذہبی جماعت کے مدرسے بھی جلد کھول دیے جائیں گے، اہلسنت و الجماعت کے علما کو ان مدارس کا کنٹرول دیا جائے گا، حکومت اس مذہبی جماعت کے خلاف عدالتی کارروائی کو یقینی بنائے گی۔

وزیر اطلاعات پنجاب کا کہنا تھا کہ والدین بچوں کو ٹی ایل پی کی سرگرمیوں سے بچائیں ورنہ ان پر دہشت گردی کے مقدمہ ہوں گے، جو بچہ ایسی سرگرمی میں ملوث ہوگا اسے کہیں داخلہ ملے گا، نہ ویزہ، نہ ہی ملک میں کوئی سہولت ملے گی جبکہ قانون ہاتھ میں لینے والوں کیخلاف دہشت گردی کے مقدمہ ہوں گے۔

انہوں نے مزید کہا کہ سعد رضوی کے نام پر 95 بینک اکاؤنٹ، تمام منقولہ اور غیر منقولہ  جائیدادیں منجمد کر دی گئی ہیں، رضوی برادران کو پناہ دینے والوں سے بھی تحقیقات کی جا رہی ہیں، مالی طور یا کسی بھی طرح ان کو سپورٹ کرنے والوں کے خلاف کارروائی کی جائے گی۔

Follow Lahore News on X

Install our App