(لاہور نیوز) جنرل ہسپتال میں ایک اور سنگِ میل عبور کرتے ہوئے سٹیٹ آف دی آرٹ پین مینجمنٹ کلینک کا افتتاح کر دیا گیا۔
یہ پین مینجمنٹ کلینک شعبہ اینستھیزیا، آئی سی یو اور پین مینجمنٹ نے شعبہ آرتھوپیڈکس کے اشتراک سے شروع کیا ہے، افتتاحی تقریب سے خطاب کرتے ہوئے پرنسپل امیرالدین میڈیکل کالج پروفیسر ڈاکٹر فاروق افضل نے کہا کہ یہ کلینک اُن مریضوں کے لیے باعثِ راحت ہوگا جو برسوں سے کرانک درد میں مبتلا ہیں، پنجاب حکومت کی پالیسی کے تحت مریضوں کو یہ تمام سہولیات بلا معاوضہ فراہم کی جائیں گی اور یہ کلینک جدید اور محفوظ علاج کی فراہمی کے حوالے سے ایک انقلابی پیش رفت ہے۔
پروفیسر ڈاکٹر فاروق افضل نے کہا کہ ہمارا مقصد ایسے مریضوں کو سکون دینا ہے جو کئی سالوں سے درد کا شکار ہیں، یہ کلینک پنجاب کے سرکاری شعبہ صحت میں درد کے علاج کے میدان میں ایک نئی مثال قائم کرے گا اور صوبے بھر کے مریضوں کے لیے امید کی نئی کرن ثابت ہو گا۔
تقریب میں ایگزیکٹو ڈائریکٹر پنز پروفیسر آصف بشیر، ایم ایس پروفیسر فریاد حسین اور پروفیسر جودت سلیم سمیت بڑی تعداد میں ماہرینِ صحت نے شرکت کی۔
