(لاہور نیوز) پاکستان اور بھارت کی ٹیمیں ہینڈ شیک تنازع کے بعد آج ایشیا کپ کے سپر فور مرحلے میں پھر ٹکرائیں گی۔

 ایونٹ میں دو روایتی حریفوں پاکستان اور بھارت کی ٹیموں میں آج پھر زور کا جوڑ پڑے گا، میچ پاکستانی وقت کے مطابق شام ساڑھے 7 بجے شروع ہوگا، گراؤنڈ وہی، ٹیمیں وہی اور میچ ریفری بھی اینڈی پائی کرافٹ ہی ہوں گے۔

واضح رہے کہ گروپ میچ میں پاکستان کو بھارت نے 7 وکٹ سے شکست دی تھی۔

گزشتہ روز میچ کی تیاری کیلئے قومی سکواڈ دبئی کرکٹ اکیڈمی پہنچا تو پاکستان کے ساتھ بھارتی فینز نے ان کا استقبال کیا، بھارتی فینز نے اپنے پسندیدہ کھلاڑی فخر زمان کے تصاویر بنوائیں اور آٹو گراف بھی لیا۔

اس موقع پر چیئرمین پی سی بی محسن نقوی نے پاکستانی کرکٹ ٹیم سے ملاقات کی۔

آئی سی سی اکیڈمی میں محسن نقوی کی آمد پر بھارتی سپورٹنگ سٹاف اور کھلاڑی ٹریننگ سیشن ختم کر کے ہوٹل چلے گئے، محسن نقوی نے کوچ مائیک ہیسن اور کپتان سلمان علی آغا سے گفتگو کی، دیگر کھلاڑیوں سے بھی ملاقات کر کے حوصلہ بڑھایا۔

ٹیم مینجمنٹ نے کپتان سے مل کر بھارت کیخلاف میچ کی حکمت عملی بنا لی، اوپنر بلے باز صائم ایوب کا بیٹنگ آرڈر تبدیل کرنے کا فیصلہ کیا گیا ہے، اوپننگ سے ہٹا کر نمبر چار پر بیٹنگ کرائے جانے کا امکان ہے، فائنل الیون میں بھی تبدیلی متوقع ہے۔

حسن نواز کی جگہ حسین طلعت کو پلیئنگ الیون میں شامل کئے جانے کا امکان ہے، فاسٹ باؤلنگ میں شاہین اور حارث کو ہی رکھنے پر اتفاق کیا گیا ہے۔

شائقین کرکٹ نے ایک بار پھر قومی ٹیم سے امیدیں وابستہ کر لیں اور ٹیم پاکستان کی جیت کے لئے دعا گو ہیں، ان کا کہنا ہے کہ پاکستانی ٹیم ہار کا بدلہ چکائے گی۔

ہینڈ شیک تنازع اور ریفری کی معافی

یاد رہے کہ 14 ستمبر کو کھیلے گئے پاک بھارت میچ میں دونوں ٹیموں کے کپتانوں نے نہ تو ٹاس کے وقت اور نہ ہی میچ کے اختتام پر ہاتھ ملایا تھا۔

بعدازاں یہ انکشاف ہوا کہ میچ ریفری اینڈی پائی کرافٹ نے پاکستانی کپتان سلمان علی آغا کو بھارتی کپتان سے ہاتھ نہ ملانے کا کہا تھا، پاکستان کرکٹ بورڈ نے اس رویے پر شدید احتجاج کیا اور آئی سی سی کو ریفری ہٹانے کا مطالبہ کیا۔

تاہم دوسرے میچ سے قبل اینڈی پائی کرافٹ نے پاکستانی ٹیم سے باضابطہ معذرت کر لی، جس کی ویڈیو بھی جاری کر دی گئی۔

Follow Lahore News on X

Install our App