19 Sep 2025
(ویب ڈیسک) پنجاب حکومت نے سیلاب سے متاثرہ علاقوں کے طلبہ کیلئے فیسوں میں ریلیف کے فیصلے پر غور شروع کر دیا۔
وزیر تعلیم رانا سکندر حیات کا کہنا ہے حکومت کو تجویز دی ہے کہ سیلاب زدہ علاقوں کے پبلک تعلیمی اداروں کے طلبہ کی رجسٹریشن اور سمسٹر فیس معاف کی جائے، حتمی فیصلہ وزیراعلیٰ پنجاب کی منظوری کے بعد کیا جائے گا۔
فیصلے سے سیلاب متاثرہ خاندانوں پر مالی بوجھ کم ہو گا، متاثرہ طلبہ کو تعلیم جاری رکھنے کیلئے حکومت ہر ممکن تعاون فراہم کرے گی، فیصلے کا اطلاق پبلک کالجز اور یونیورسٹیوں پر ہو گا۔
رانا سکندر حیات نے مزید کہا کہ نجی سکولز، کالجز اور یونیورسٹیاں بھی متاثرہ طلبہ کو ریلیف دینے کا اقدام کریں، ملک کو درپیش موجودہ چیلنج سے نکلنے کیلئے مشترکہ کردار ادا کرنے کی ضرورت ہے، ہم سب نے ملکر ہی سیلاب متاثرین کیلئے مشکل کی گھڑی میں امید بننا ہے۔
