(لاہور نیوز) وزیراعلیٰ پنجاب مریم نواز شریف نے کہا ہے کہ بچوں کی سمگلنگ کا خاتمہ پنجاب حکومت کی اولین ترجیح ہے۔

وزیراعلیٰ پنجاب مریم نواز شریف نے انسانی سمگلنگ کے خلاف عالمی دن کے موقع پر اپنے پیغام میں کہا ہے کہ انسانی سمگلنگ درحقیقت غلامی کی ہی ایک جدید شکل ہے، جس کا خاتمہ حکومت پنجاب کی اولین ترجیحات میں شامل ہے۔

وزیراعلیٰ نے کہا کہ اس دن کا مقصد عوام میں شعور اجاگر کرنا ہے تاکہ وہ اس مکروہ دھندے کی سنگینی کو سمجھ سکیں، انہوں نے اس بات پر شدید دکھ کا اظہار بھی کیا کہ غیر قانونی طور پر یورپ جانے کے دوران کشتی الٹنے سے درجنوں قیمتی جانوں کا ضیاع ایک بہت بڑا انسانی المیہ ہے۔

مریم نواز شریف نے انسانی سمگلروں کو کڑی تنقید کا نشانہ بناتے ہوئے کہا کہ یہ لوگ دولت کی ہوس میں معصوم شہریوں کی زندگیوں سے کھیلنے سے بھی گریز نہیں کرتے، بچے میری ریڈ لائن ہیں، ان کی حفاظت میری اولین ترجیح ہے۔

انہوں نے اس عزم کا اظہار کیا کہ پنجاب حکومت بچوں کے استحصال کے خلاف زیرو ٹالرنس کی پالیسی پر عمل پیرا ہے اور کسی بھی صورت میں انسانی سمگلنگ کو برداشت نہیں کیا جائے گا، والدین کو بھی چاہئے کہ وہ اپنے بچوں کو روزگار کے نام پر غیر قانونی راستوں سے بیرونِ ملک بھیجنے سے گریز کریں۔

وزیراعلیٰ نے عوام پر زور دیا کہ وہ غیر ملکی سفر کیلئے جائز، قانونی اور محفوظ ذرائع اختیار کریں تاکہ کسی قسم کے خطرے سے بچا جا سکے۔

مریم نواز شریف نے یقین دہانی کرائی کہ حکومت پنجاب تمام ممکنہ وسائل بروئے کار لاتے ہوئے انسانی سمگلنگ کا خاتمہ یقینی بنائے گی تاکہ ہر بچہ، ہر نوجوان اور ہر شہری ایک محفوظ اور روشن مستقبل کی جانب بڑھ سکے۔

Follow Lahore News on Facebook

Install our App