(لاہور نیوز) پی ڈی ایم اے کا کہنا ہے کہ مون سون بارشوں کا پانچواں سپیل 28 جولائی سے شروع ہو گا، پنجاب بھر کے اضلاع کی انتظامیہ کو الرٹ جاری کر دیا گیا۔

ترجمان پی ڈی ایم اے کے مطابق 28 سے 31 جولائی کے دوران پنجاب کے بیشتر اضلاع میں مون سون بارشوں کا امکان ہے ، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد میں بارش کی پیشگوئی ہے،لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، چنیوٹ، فیصل آباد، اور اوکاڑہ میں بھی بارش برسنے کا امکان ہے۔

پی ڈی ایم اے کا کہنا ہے کہ 29 جولائی سے ڈیرہ غازی خان، بھکر، بہاولپور، خانیوال، پاکپتن، وہاڑی، لودھراں، مظفرگڑھ اور راجن پور میں بارشوں کی پیشگوئی ہے۔

ریلیف کمشنر پنجاب نبیل جاوید نے صوبہ بھر کے کمشنرز و ڈپٹی کمشنرز کو الرٹ رہنے کی ہدایت جاری کر دی۔

ریلیف کمشنر پنجاب نے کہا ہے کہ ایمرجنسی کنٹرول رومز میں سٹاف کو الرٹ رکھا جائے، ریسکیو 1122 کی ڈیزاسٹر رسپانس ٹیموں کو بھی ہائی الرٹ رکھا جائے، رواں سال مون سون بارشوں کی شدت زیادہ ہے، گزشتہ سال کی نسبت اس سال 73 فیصد زیادہ بارشیں ریکارڈ کی جا چکی ہیں ، موسمی صورتحال کے پیش نظر تمام متعلقہ محکمے الرٹ رہیں ۔

انہوں نے کہا کہ عوام جاری کردہ احتیاطی تدابیر پر عمل کریں،شدید بارشوں کے باعث مری و گلیات میں لینڈ سلائیڈنگ کا خطرہ ہے، بارشوں کے باعث کچے مکانات اور مخدوش عمارتوں کو نقصان کا خدشہ ہے ، مسافر اور سیاح موسمی صورتحال کے پیش نظر محتاط رہیں اور غیر ضروری سفر سے گریز کریں ، اربن و فلیش فلڈنگ کی صورت میں محفوظ مقامات پر رہیں، گاڑی ہرگز بہتے ہوئے پانی سے کراس نہ کریں۔

Follow Lahore News on Facebook

Install our App