(لاہور نیوز) ملی نغموں کی موسیقی ترتیب دینے والے خلیل احمد کی آج 28 ویں برسی ہے۔
1934ء میں بھارتی شہر گورکھپور میں پیدا ہونے والے خلیل احمد کا پورا نام خلیل احمد خان یوسفزئی تھا، انہوں نے آگرہ یونیورسٹی سے گریجویشن کے بعد 1952ء میں پاکستان ہجرت کی اور یہاں مہدی ظہیر سے موسیقی کے فن میں مہارت حاصل کی۔
1962ء میں ان کی پہلی فلم "آنچل" ریلیز ہوئی، جس کے گیتوں نے انہیں راتوں رات شہرت دلائی، ان کے مشہور نغمات میں "کسی چمن میں رہو تم"، "تجھ کو معلوم نہیں"، "تجھ کو بھلا کیا معلوم" اور "کھٹی کڑھی میں مکھی پڑی" شامل ہیں۔
خلیل احمد کی کامیاب فلموں میں دامن، خاموش رہو، کنیز، مجاہد، میرے محبوب، ایک مسافر ایک حسینہ، آنچ، داستان اور آج اور کل شامل ہیں، فلمی موسیقی کے ساتھ ساتھ وہ پی ٹی وی کے مقبول بچوں کے پروگرام آنگن آنگن تارے کے میزبان بھی رہے اور متعدد یادگار ٹی وی نغموں کی دھنیں ترتیب دیں۔
21 جولائی 1997ء کو خلیل احمد کا انتقال ہوا، ان کی آخری آرام گاہ لاہور کے میانی صاحب قبرستان میں واقع ہے، ان کی موسیقی کا جادو آج بھی سننے والوں کے دلوں پر چھایا ہوا ہے۔
