(مدثر علی رانا) آئی ایم ایف نے آئندہ مالی سال کے بجٹ کیلئے پاکستان کے دفاعی بجٹ میں اضافے اور تنخواہ پر ٹیکس ریلیف دینے کے دو بڑے مطالبات تسلیم کر لئے۔

ذرائع کے مطابق حکومت نے آئی ایم ایف کو درخواست کی کہ دفاعی ضروریات میں اضافے کو مؤخر نہیں کیا جا سکتا جس پر آئی ایم ایف نے پاکستان کی دفاعی ترجیحات کو تسلیم کیا اور دفاعی بجٹ میں ضروری اضافے پر راضی ہو گیا۔

ذرائع  نے بتایا ہے کہ تنخواہ دار طبقے کیلئے انکم ٹیکس ریلیف پر بھی حکومت کو بڑی کامیابی ملی ہے اور تنخواہ دار طبقے کے تمام سلیب پر انکم ٹیکس کی شرح کم ہو گی۔

واضح رہے کہ وزیرخزانہ نے کہا تھا کہ بجٹ میں افواج پاکستان کی ہر ممکن مدد کی جائے گی، یہ صرف افواج کی نہیں پاکستان کی ضرورت ہے۔

ذرائع  نے بتایا ہے کہ انکم ٹیکس ایکٹ کی شق 129 میں رعایت انکم ٹیکس میں کمی سے متعلق ہے، آئی ایم ایف نے ٹیکس فری آمدن کی سالانہ حد 6 لاکھ سے بڑھانے پر آمادگی ظاہر کی ہے۔

آئندہ بجٹ میں ماہانہ 50 ہزار کی بجائے 83 ہزار روپے تنخواہ ٹیکس فری ہو سکتی ہے، ماہانہ ایک لاکھ روپے تنخواہ پر انکم ٹیکس 5 فیصد سے کم ہو کر 2.5 فیصد ہو سکتا ہے، ماہانہ ایک لاکھ 83 ہزار روپے تنخواہ پر انکم ٹیکس کی شرح 15 فیصد سے کم ہو کر 12.5 فیصد ہو سکتی ہے۔

اسی طرح ماہانہ 2 لاکھ 67 ہزار روپے تنخواہ پر انکم ٹیکس کی شرح 25 فیصد سے کم ہو کر 22.5 فیصد ہو سکتی ہے، ماہانہ 3 لاکھ 33 ہزار روپے تک کی تنخواہ پر انکم ٹیکس کی شرح 30 فیصد کی بجائے 27.5 فیصد ہو سکتی ہے، ماہانہ 3 لاکھ 33 ہزار روپے سے زائد تنخواہ پر انکم ٹیکس کی شرح 2.5 سے کم ہو کر 32.5 فیصد ہو سکتی ہے۔

ذرائع  نے یہ بھی بتایا ہے کہ آئی ایم ایف کو یقین دہانی کرائی گئی ہے کہ آئی ایم ایف کی شرائط کے مطابق باقی تمام اہداف پورے کئے جائیں گے اور آئندہ اقتصادی جائزہ کی شرائط پر بروقت عملدرآمد کیا جائے گا۔

آئی ایم ایف نے معاشی کارکردگی اور آئندہ کے اہداف پر عملدرآمد کی یقین دہانی کے بعد حکومت کی دفاعی بجٹ میں اضافے اور تنخواہ دار طبقہ کے لئے ٹیکس ریلیف کی درخواست پر رضامندی ظاہر کی ہے۔

Subscribe Lahore News on YouTube

Install our App