(لاہور نیوز) سینیٹر فیصل واوڈا نے ایک بار پھردعویٰ کیا ہے کہ فیض حمید کا کورٹ مارشل ہونا ہےاور انہیں 14سال قید ہوگی۔

دنیا نیوز کے پروگرام ’’ٹو نائٹ ود ثمرعباس‘‘ میں گفتگو کرتے ہوئے فیصل واوڈا کا کہنا تھا کہ ہم نے متحد ہو کر بھارت سے جنگ جیتی ہے، عوام مسلح افواج کے پیچھے کھڑے ہیں، بھارت کم ظرف اور گھٹیا دشمن ہے، ہم نے صرف دفاعی نہیں سفارتی اور دیگرمحاذوں پر بھی جنگ جیتی ہے۔

انہوں نے کہا کہ بلوچستان میں جو بربریت کو جائز کہے گا انہیں بھی دہشت گردوں کی طرح ٹریٹ کریں گے، ہم بھارتی پراکسی وار کا جواب دیں گے، بھارت میں کم ظرف وزیراعظم مسلط ہے۔

سینیٹر کا کہنا تھا کہ فیض حمید کا کورٹ مارشل ہونا ہے  انہیں14سال قید ہونی ہے، جب فوج والے اپنے بندے کو نہیں چھوڑیں گے تو کیا باقی بچ جائیں گے؟

فیصل واوڈا نے کہا کہ سیاست غیرمتعلقہ ہوگئی، سیاست دانوں نے رول بھی ادا نہیں کیا، جو لیڈرشپ ڈیموکریٹک سسٹم سے ملنا تھی وہ آرمی چیف کی شکل میں ملی، فیلڈ مارشل نے سب کو متحد کر دیا اور پاکستان کا جھنڈا فخر سے لہرایا، اس کا کریڈٹ تو فیلڈ مارشل کو دینا چاہیے۔

ان کا کہنا تھا کہ ڈیموکریٹک سسٹم کی جوکمزوریاں تھیں وہ اس کامیابی کےنیچے چھپ گئی ہیں، شہبازشریف کوبھی کریڈٹ جاتا ہے، جنگ ان کے دور میں جیتی گئی، وزیراعظم اس کریڈٹ کا بھرپور فائدہ اٹھا کر سیاست دانوں کو انگیج کریں۔

سینیٹر نے کہا کہ پی ٹی آئی قیادت یہ طے نہیں کر پا رہی کہ ان کی پارٹی میں کون مخلص، کون نہیں اور اسٹیبلشمنٹ پی ٹی آئی سےبات کرنے میں انٹرسٹڈ نہیں ہے، عید کے بعد تحریک انصاف میں بہت سی تبدیلیاں ہوسکتی ہیں، جیسے ایم کیوایم پاکستان ویسے ہی پی ٹی آئی پاکستان بن چکی ہے۔

فیصل واوڈا کا مزید کہنا تھا کہ تحریک انصاف نےتین مواقع ضائع کردیئے ہیں، اب کہہ رہے ہیں کہ آئی ایم ایف سے بات نہیں ہونے دیں گے، اگر اس طرح کی غیر میچور باتیں کریں گے تو پھر سیاسی طور پر اڑا دیں گے آپ کو، تحریک انصاف کو راستہ بنانا پڑے گا اگر راستہ بنائیں گے تو کامیابی ورنہ سیاسی طور پر مارے جائیں گے۔

Follow Lahore News on Facebook

Install our App