(ویب ڈیسک) پاکستان سپر لیگ (پی ایس ایل) سیزن 10 کے 24 ویں میچ میں کراچی کنگز نے لاہور قلندرز کو سنسنی خیز مقابلے کے بعد 4 وکٹوں سے شکست دیدی۔

قذافی سٹیڈیم لاہور میں ہونیوالے میچ میں کراچی کنگز  نے ٹاس جیت کر لاہور قلندرز کو پہلے بیٹنگ کی دعوت دی، پہلے بیٹنگ کرتے ہوئے لاہور قلندرز  نے مقررہ 15 اوورز میں 8 وکٹوں کے نقصان پر 160 رنز بنائے جبکہ ڈی ایل ایس میتھڈ کے تحت کراچی کنگز کو جیت کے لئے 168رنز کا ہدف دیا گیا۔

لاہور قلندرز کی اننگز کے دوران 7.5 اوورز کا میچ مکمل ہونے پر بارش شروع ہو گئی جس کے باعث میچ کو روک دیا گیا تھا۔

بارش کے باعث میچ کو 15 اوورز فی اننگز تک محدود کر دیا گیا، بارش سے پہلے لاہور قلندرز  نے 7.5 اوورز میں ایک وکٹ کے نقصان پر 90 رنز بنا لئے تھے۔

لاہور قلندرز کی جانب سے اوپنر بلے باز محمد نعیم  نے 29 گیندوں پر 65 رنز کی شاندار اننگز کھیلی جبکہ فخر زمان نے 51 رنز بنائے، عبداللہ شفیق 18، سکندر رضا 8، سیم بلنگز اور آصف علی 2، 2 رنز بنا کر آؤٹ ہوئے جبکہ ڈیرل مچل اور شاہین شاہ آفریدی بغیر کھاتے کھولے چلتے بنے۔

کراچی کنگز کی جانب سے عباس آفریدی نے 4 جبکہ میر حمزہ، حسن علی اور عامر جمال  نے ایک ایک کھلاڑی کو پویلین کی راہ دکھائی۔

ڈیوڈ وارنر 13 گیندوں پر دو چوکوں اور دو چھکوں کی مدد سے 24 اور سیفرٹ 10 گیندوں پر 4 چوکوں اور ایک چھکے کی مدد سے 24 رنز بنا کر آؤٹ ہو گئے۔

کنگز کے سعد بیگ نے صرف 15 گیندوں کا سامنا کیا، 3 چوکوں اور ایک چھکے کی مدد سے 25 رنز بنا کر آؤٹ ہوئے، خوشدل شاہ کی اننگز 9 رنز تک محدود رہی۔

میچ کے اختتامی لمحات میں محمد نبی 8 گیندوں پر 15 رنز بنا کر آؤٹ ہوئے تاہم عرفان خان نیازی نے شان دار بیٹنگ کی اور آؤٹ ہوئے بغیر 21 گیندوں پر دو چوکوں اور 5 چھکوں کی مدد سے 48 رنز کی اننگز کھیلی۔

کراچی کنگز  نے 168 رنز کا ہدف 15 ویں اوور کی تیسری گیند پر حاصل کیا جبکہ 6 بیٹرز آؤٹ ہوئے۔

لاہور قلندرز کو شکست دے کر کنگز  نے پوائنٹس ٹیبل پر اپنی پوزیشن بہتر کی اور 8 میچوں میں 10 پوائنٹس کے ساتھ تیسرے نمبر پر ہے جبکہ قلندرز کی ٹیم 9 پوائنٹس کے ساتھ چوتھے نمبر پر چلی گئی ہے۔

Follow Lahore News on Facebook

Install our App