(ویب ڈیسک) پاکستان سپر لیگ (پی ایس ایل) سیزن 10 کے 24 ویں میچ میں لاہور قلندرز نے کراچی کنگز کو جیت کیلئے 168 رنز کا ہدف دے دیا۔

قذافی سٹیڈیم لاہور میں ہونیوالے میچ میں کراچی کنگز نے ٹاس جیت کر لاہور قلندرز کو پہلے بیٹنگ کی دعوت دی، پہلے بیٹنگ کرتے ہوئے لاہور قلندرز نے مقررہ 15 اوورز میں 8 وکٹوں کے نقصان پر 160 رنز بنائے جبکہ ڈی ایل ایس میتھڈ کے تحت کراچی کنگز کو جیت کے لیے 168رنز کا ہدف دیا گیا۔

لاہور قلندرز کی اننگز کے دوران 7.5 اوورز کا میچ مکمل ہونے پر بارش شروع ہوگئی جس کے باعث میچ کو روک دیا گیا تھا۔

بارش کے باعث میچ کو 15 اوورز فی اننگز تک محدود کردیا گیا، بارش سے پہلے لاہور قلندرز نے 7.5 اوورز میں ایک وکٹ کے نقصان پر 90 رنز بنا لیے تھے۔

لاہور قلندرز کی جانب سے اوپنر بلے باز محمد نعیم نے 29 گیندوں پر 65 رنز کی شاندار اننگز کھیلی جبکہ فخر زمان نے 51 رنز بنائے، عبداللہ شفیق 18، سکندر رضا 8، سیم بلنگز اور آصف علی 2، 2 رنز بناکر آؤٹ ہوئے جبکہ ڈیرل مچل اور شاہین شاہ آفریدی بغیر کھاتے کھولے چلتے بنے۔

کراچی کنگز کی جانب سے عباس آفریدی نے 4 جبکہ میر حمزہ، حسن علی اور عامر جمال نے ایک ایک کھلاڑی کو پویلین کی راہ دکھائی۔

واضح رہے کہ پی ایس ایل کی پوائنٹس ٹیبل پر کوئٹہ گلیڈی ایٹر 8 میچ کے بعد 11 پوائنٹس کے ساتھ سرِ فہرست ہے جبکہ اسلام آباد یونائیٹڈ اتنے ہی میچز میں 10 پوائنٹس کے ساتھ دوسرے نمبر پر ہے۔

لاہور قلندرز کی نمبرز کی دوڑ میں تیسری پوزیشن ہے، جس کے پوائنٹس کی تعداد 9 ہے جبکہ کراچی کنگز 8 پوائنٹس کے ساتھ چوتھی اور پشاور زلمی 6 پوائنٹس کے ساتھ 5 ویں پوزیشن پر ہے۔

Follow Lahore News on X

Install our App