(لاہورنیوز) وزیراعلیٰ پنجاب مریم نواز نے کہا ہے کہ پنجاب کی ثقافت میرے دل کے قریب ہے۔
صوبائی دارالحکومت کے الحمرا ہال میں پنجابی کلچر ڈے کی تقریب سے خطاب کرتے ہوئے مریم نواز کا کہنا تھا کہ پنجاب ایک خوبصورت صوبہ ہے، پنجابی بولنے والوں کو اپنی زبان پر فخر ہونا چاہیے۔انہوں نے کہا کہ مجھے پنجاب کی مٹی اور کلچرسے محبت ہے، مشرف دور میں ہمیں ملک سے جانا پڑا، اس وقت بھی ہمیں اپنے وطن کی بہت یاد آتی تھی، پنجاب کی ثقافت میرے دل کے قریب ہے۔
وزیراعلیٰ پنجاب کا کہنا تھا کہ 30سال بعد ملک میں ہارس اینڈ کیٹل شو کا انعقاد ہوا، کوئی بھی گانا سن لیں لیکن بھنگڑے کا کوئی متبادل نہیں ہے۔مریم نواز نے کہا کہ مخالفین ملک ڈیفالٹ کرنے کی باتیں کررہے ہیں،سٹاک مارکیٹ روزانہ کی بنیاد پر اوپر جارہی ہے، اب ملک کے حالات بہت بہتر ہورہے ہیں اور باہر سے سرمایہ کاری بھی آرہی ہے۔
ان کا مزید کہنا تھا کہ میری پوری کوشش ہوتی ہے آٹےکی قیمت کم رہے، حکومت عوام کوریلیف فراہمی کےلیےہرممکن اقدام کر رہی ہے۔قبل ازیں وزیراعلیٰ پنجاب نے تین روزہ پنجابی کلچر ڈے کا افتتاح کیا ، افتتاحی تقریب میں ملکی فنکاروں اور اعلیٰ شخصیات نے بڑی تعداد میں شرکت کی ۔علاوہ ازیں مریم نواز نے افتتاح کے موقع پر الحمرا ہال میں لگائے گئے سٹالز کا بھی معائنہ کیا۔
