(لاہور نیوز) وزیر اعظم شہباز شریف نے وفاقی دارالحکومت میں اوورسیز پاکستانیوں کے مسائل کو حل کرنے کیلئے خصوصی عدالتوں کے قیام کا اعلان کر دیا۔

وزیر اعظم شہباز شریف کا سمندر پار مقیم پاکستانیوں کے کنونشن سے خطاب کرتے ہوئے کہنا تھا کہ اوورسیز پاکستانیوں کے جذبے اور قربانیوں کو سلام پیش کرتے ہیں، ایک کروڑ سے زائد پاکستانی دنیا کے مختلف ملکوں میں مقیم ہیں۔

انہوں نے کہا کہ اسلام آباد میں اوورسیز پاکستانیوں کے مسائل حل کرنے کیلئے خصوصی عدالتیں قائم کر دی گئی ہیں، پنجاب میں بھی ایسی عدالتیں قائم کرنے کیلئے اقدامات جاری ہیں۔

وزیر اعظم کا کہنا تھا کہ بیرون ملک مقیم پاکستانیوں  نے محنت، لگن اور قربانیوں سے اپنا مقام بنایا، آپ ہمارے سروں کے تاج اور ہمارے ایمبیسڈر ہیں، اوورسیز پاکستانیوں کا دل پاکستان کے ساتھ دھڑکتا ہے، بیرون ملک مقیم پاکستانی محنت سے رزق حلال کما رہےہیں، بیرون ملک مقیم پاکستانی ملک کا فخرہیں۔

شہباز شریف نے کہا کہ جنرل عاصم منیر کے ہوتے ہوئے کوئی پاکستان کو میلی آنکھ سے نہیں دیکھ سکتا، آرمی چیف کی زبان پر وہی ہوتا ہے جو ان کے دل میں ہوتا ہے، سب جانتے ہیں دہشت گردوں کو کون فنڈنگ کر رہا ہے اور دہشت گردی کے تانے بانے کہاں ملتے ہیں، 2018 میں ملک سے دہشت گردی کا خاتمہ ہو چکا تھا، سپہ سالار عاصم منیر ایک سچے پاکستانی اور زبردست پروفیشنل ہیں۔

انہوں  نے کہا کہ پاکستان کا دفاع مضبوط ہے، ہماری افواج اپنی جان کا نذرانہ دے کر قوم کے مستقبل کو محفوظ بنا رہی ہیں، ماضی کی غلطیوں کی وجہ سے ملک میں دہشتگردی واپس آئی، سوات اور دیگر علاقوں سے دہشت گردوں کو لا کر بسایا گیا۔

Follow Lahore News on Facebook

Install our App