(لاہور نیوز) لاہور ہائی کورٹ نے ہدایت کی ہے کہ پی ڈی ایم اے صوبے میں واٹر ایمرجنسی ڈیکلیریشن کو یقینی بنائے۔

لاہور ہائیکورٹ کے جسٹس شاہد کریم  نے سموگ تدارک کیس کی گزشتہ سماعت کا تحریری حکم نامہ جاری کر دیا۔ 

حکم نامہ کے مطابق ڈی جی پی ڈی ایم اے نے پانی کی سنگین صورتحال سے متعلق رپورٹ جمع کروائی، رپورٹ میں پاکستان میٹرولوجیکل ڈیپارٹمنٹ کی پنجاب بھر میں خشک سالی کی الرٹ کا تذکرہ کیا گیا ہے، خشک سالی کے الرٹ میں دریاؤں میں جمع شدہ پانی کی انتہائی کمی کی جانب اشارہ کیا گیا ہے، زیر زمین پانی کے حوالے سے یہ ایک خطرناک صورتحال ہے، سٹیک ہولڈرز کو فوراً اقدامات اٹھانے چاہئیں۔

تحریری حکم نامہ میں لکھا گیا کہ رپورٹ میں تمام اداروں کی پی ڈی ایم اے کے ساتھ بہتر کوآرڈینیشن کیلئے کمیٹی کی نامزدگی کا بھی حوالہ دیا گیا ہے، کمیٹی پانی کے حوالے سے اٹھائے گئے اقدامات سے متعلق رپورٹ جمع کروائے، پی ڈی ایم اے پنجاب بھر میں واٹر ایمرجنسی ڈیکلیئر کرنے کو یقینی بنائیں، ڈی جی پی ڈی ایم اے اس معاملے پر غور و خوض کیلئے پنجاب کابینہ کو ایک سمری بھیجیں۔

 تحریری حکم نامہ میں یہ بھی لکھا گیا کہ وکیل پنجاب حکومت نے جوائنٹ رجسٹرار کوآپریٹو سوسائٹیز لاہور کا آرڈر عدالت میں پیش کیا، آرڈر میں تمام کوآپریٹو سوسائٹیز کو پانی کے بچاؤ کے حوالے سے فوری اقدامات کرنے کا حکم دیا گیا ہے، کوآپریٹو ڈیپارٹمنٹ کی جانب سے رہائشی علاقوں میں پائپ کے استعمال اور گاڑیاں دھونے پر پابندی کے حوالے سے ایک اور حکم جاری کیا جائے گا، نئے آرڈر میں نہ صرف رہائشیوں بلکہ متعلقہ سوسائٹی کی انتظامیہ پر جرمانے کا بھی ذکر کیا جائے گا۔

عدالت نے واٹر ایمرجنسی پر غور و خوض کیلئے ڈی جی پی ڈی ایم اے کو پنجاب کابینہ کو سمری بھیجنے کی ہدایت کر دی اور کیس کی مزید سماعت 11 اپریل تک ملتوی کر دی۔

Subscribe Lahore News on YouTube

Install our App