نارووال میں جلسہ سے خطاب کرتے ہوئے مریم نواز کا کہنا تھا کہ جس نواز شریف کو مارنے اور گرانے کی کوشش کی گئی آج مرکز میں اس کے بھائی اور  پنجاب میں بیٹی کی حکومت ہے، مسلم لیگ ن کی حکومت عوام کی خدمت کر رہی ہے۔

انہوں نے کہا کہ کہ نواز شریف کی قیادت میں ملک کو مشکلات سے نکال دیا ہے، اڈیالہ جیل کے علاوہ ہر جگہ سے اچھی خبریں آ رہی ہیں، ہم دن رات محنت کر کے عوام کی زندگیوں کو تبدیل کر کے رہیں گے۔

وزیر اعلیٰ پنجاب کا کہنا تھا کہ بتایا جائے کہاں ہے وہ پاکستان جس کے ڈیفالٹ کی باتیں کی جا رہی تھیں، آج پاکستان کی معیشت ٹیک آف کر رہی ہے، عوام گواہی دے رہے ہیں کہ نواز شریف نے پاکستان کو مشکلات سے نکال دیا۔

مریم نواز  نے کہا کہ عمران خان کے دور حکومت میں سٹاک مارکیٹ کریش کر گئی تھی جبکہ دہشتگردی ملک میں دوبارہ آگئی تھی لیکن آج سب کچھ اس کے برعکس ہے اور مہنگائی 38 سے 5 فیصد پر آگئی ہے۔

ان کا کہنا کہ پی ٹی آئی کے دور میں پنجاب سے ایک ہی خبر آتی تھی کہ گوگی یہ کھا گئی اور پنکی وہ کھا گئی، سفارش اور رشوت کے بغیر صوبے میں کوئی کام نہیں ہوتا تھا۔

وزیر اعلیٰ پنجاب نے کہا کہ میں  نے ایک سال میں پنجاب میں دن رات ایک کر کے کام کیا، آج صوبے کو صاف ستھرا کیا جارہا ہے جبکہ روٹی 25 روپے سے 12 سے 13 روپے پر آگئی ہے۔

مریم نواز کا کہنا تھا کہ پنجاب حکومت غریبوں کو گھر بنانے کے لیے قرضہ دے رہی ہے جبکہ کسانوں کو کسان کارڈ دیے گئے ہیں، اس کے علاوہ معذور افراد کو ہمت کارڈ فراہم کیے گئے ہیں۔

انہوں نے کہا کہ یوتھ کا نعرہ لگانے والوں نے نوجوانوں کو کیا دیا؟ ہم سکالر شپس کو بڑھا کر 50 ہزار تک لے کر جا رہے ہیں جبکہ جلد ایک لاکھ لیپ ٹاپس بھی تقسیم کیے جائیں گے۔

وزیر اعلیٰ پنجاب نے مزید کہا کہ اس کے علاوہ مستحق افراد کو گھروں کی تعمیر کے لیے قرضہ دیا جا رہا ہے جبکہ صوبے میں صحت کی بنیادی سہولیات بھی فراہم کی جا رہی ہیں۔