(لاہور نیوز) پاکستان مسلم لیگ (ن) کے صدر اور سابق وزیراعظم نواز شریف نے کہا ہے کہ سخت معاشی حالات کے بعد مہنگائی کم ہوئی، مزید کمی سے عوام کو ریلیف ملنے کی امید ہے۔

سابق وزیراعظم نواز شریف اور وزیراعلیٰ پنجاب مریم نواز شریف سے بہاولپور، رحیم یار خان، مظفرگڑھ، لیہ، ڈی جی خان، راجن پور ڈویژن سے تعلق رکھنے والے ارکان پنجاب اسمبلی نے ملاقات کی۔

نواز شریف نے ارکان اسمبلی سے گفتگو کرتے ہوئے کہا کہ اللہ تعالیٰ آسانیاں فرما رہا ہے، معاشی ٹرن آراؤنڈ ہوتا نظر آ رہا ہے، پالیسی ریٹ میں کمی  نے کاروباری برادری کا اعتماد بڑھایا ہے، سخت معاشی حالات کے بعد مہنگائی میں کمی ہوئی، مزید کمی سے عوام کو مزید ریلیف ملنے کی امید ہے۔

انہوں نے کہا کہ الحمدللہ تعمیراتی کام پھر سے شروع ہو گئے ہیں، شہباز شریف کی محنت اور جانفشانی کا عالمی مالیاتی ادارے بھی اعتراف کر رہے ہیں، وقت نے ثابت کیا کہ مخالفین کو بغض، حسد، گالم گلوچ، بدتمیزی اور بدتہذیبی کے سوا کچھ نہیں آتا۔

صدر مسلم لیگ (ن) کا کہنا تھا کہ سیاسی، دفاعی اور ترقی کے میدان میں ملک اور قوم کی خدمت کا شاندار ریکارڈ رکھتے ہیں، ترقی کا تسلسل نہ ٹوٹتا تو ملک خطے اور دنیا میں کہیں آگے ہوتا، عوام کو تکلیفیں نہ جھیلنا پڑتیں۔

وزیراعلیٰ پنجاب مریم نواز شریف نے کہا کہ قیادت، جماعت اور پنجاب کے عوام کا اعتماد بڑی ذمہ داری ہے، نواز شریف اور شہباز شریف کی عوامی خدمت کے معیار پر پورا اترنا آسان نہیں۔

اس موقع پر گفتگو کرتے ہوئے اراکین اسمبلی کا کہنا تھا کہ جب سب نا امید ہو گئے، نواز شریف نے ہمیشہ ملک اور قوم کو نئی امید دی، نواز شریف اور شہباز شریف نے ریاست پر سیاست قربان کر کے حب الوطنی کی اعلیٰ مثال قائم کی، ایک بار پھر قوم نے دیکھ لیا کہ ریلیف صرف مسلم لیگ (ن) ہی دیتی ہے۔

اجلاس میں عوامی فلاح کے منصوبوں اور مستقبل کی سیاسی حکمت عملی پر مشاورت بھی ہوئی، پارٹی کے سینئر رہنما سینیٹر پرویز رشید، رانا ثناء اللہ، پنجاب کی سینئر وزیر مریم اورنگزیب اور راشد نصر اللہ بھی اجلاس میں موجود تھے۔

Subscribe Lahore News on YouTube

Install our App