(لاہور نیوز) وزیراعلیٰ پنجاب مریم نواز نے کہا ہے کہ وزیراعظم شہباز شریف نے دن رات کام کر کے ملک کو ڈیفالٹ کے خطرے سے نکالا۔

لاہور میں آسان کاروبار فنانس اور آسان کاروبار کارڈ کی افتتاحی تقریب سے خطاب کرتے ہوئے وزیراعلیٰ پنجاب مریم نواز کا کہنا تھا کہ لوگ کہہ رہے تھے ملک ڈیفالٹ کر جائے گا، اب تمام اکنامک انڈیکیٹرز بہتری کی جانب گامزن ہیں، سٹاک مارکیٹ نے تاریخی ریکارڈ توڑا ہے، دنیا کے سرمایہ کار پاکستان کی طرف دیکھ رہے ہیں۔

انہوں نے کہا کہ وزیراعظم  نے کل اعلان کیا بجلی کی قیمت 11 روپے مزید کم ہو گی، دنیا کے ماڈلز کی سٹڈی کرتی ہوں، کسی ملک نے انڈسٹریلائزیشن کے بغیر ترقی نہیں کی، ہمیں بھی انڈسٹریلائزیشن کی طرف جانا ہے، آج شاندار پیکیج لیکر پنجاب کے عوام کے سامنے آئی ہوں، آج وزیراعلیٰ آسان کاروبار فنانس ، وزیراعلیٰ آسان کاروبار کارڈ لا رہے ہیں۔

مریم نواز کا کہنا تھا کہ منصوبے کے تحت آپ کو 3 کروڑ روپے تک کا بلاسود قرضہ ملے گا، ہم  نے آپ کے لئے بزنس پلان بھی بنا دیئے ہیں، ہم آپ کیلئے ہینڈ ہولڈنگ کا سسٹم بھی بنا رہے ہیں، آپ آج پیسے  لے لیں اور کل اپنا کاروبار شروع کر دیں، چھوٹی فیکٹری یا پلانٹ لگانے کیلئے زمین رعایت پر دیں گے۔

انہوں نے کہا کہ آپ زمین کا ٹکڑا  لے کر اپنا کاروبار شروع کر سکتے ہیں، یہ سکیم ان نوجوانوں کیلئے ہے جو اپنا کاروبار کرنا چاہتے ہیں، پاکستان میں پنک سالٹ کی کانیں ہیں، خزانہ ہے، دوسرے ممالک پاکستان کے نمک کو بیچ کر منافع کماتے ہیں، پنک سالٹ کے کاروبار میں بھی بہت وسائل ہیں۔

وزیراعلیٰ پنجاب کا کہنا تھا کہ میرا نہیں خیال پہلے ذاتی کاروبار کرنا اس سے زیادہ آسان تھا، ہم آپ سے گروی چیزیں نہیں رکھوا رہے، ہم آپ کو آسان شرائط پر بلاسود قرضہ دیں گے، جو لوگ کاروبار کرنا چاہتے ہیں انہیں اس سے بہتر سکیم نہیں مل سکتی، جن کو 3 کروڑ روپے سے زیادہ کی ضرورت ہے ان کی بھی مدد کریں گے۔

انہوں نے کہا کہ بڑی صنعت والوں کو ہم 50 لاکھ کا سولر بھی مفت دیں گے، پنجاب میں ڈومیسٹک سرمایہ کاری کیلئے یہ بہت بڑا موقع ہے، پنجاب میں ہم انڈسٹریلائزیشن کو دیکھنا چاہتے ہیں، اپنا کاروبار کرکے اکانومی کی ترقی میں بھی کردار ادا کریں، ہم عوام کی بھلائی کیلئے جو کچھ کر رہے ہیں ،ثمر جلد ملے گا۔

Follow Lahore News on Facebook

Install our App