چیف جسٹس لاہور ہائیکورٹ جسٹس مس عالیہ نیلم سائلین کی مشکلات کو کم کرنے کیلئے عملی طور اقدامات کر رہی ہے اور اس میں ٹیکنالوجی سے بھرپور استفادہ کیا جا رہا ہے ، اس سلسلے میں سب سے پہلے سائلین کے قیمتی وقت اور پیسے بچانے کیلئے اقدامات اٹھائے گئے ہیں۔

چیف جسٹس لاہور ہائیکورٹ جسٹس مس عالیہ نیلم کی منظوری کے بعد ویب سائٹ اور موبائل ایپ کے ذریعے سائلین کو ان کے کیسز سے متعلق مسلسل آگاہ رکھنے کا فیصلہ کیا گیا ہے، عدالتی کارروائی سے متعلق آگاہی لاہور ہائیکورٹ کی ویب سائٹ اور موبائل ایپ سے حاصل کی جا سکے گی۔

اس اقدام سے سائلین گھر بیٹھے اس ٹیکنالوجی کا فائدہ اٹھا کر اپنے کیسز بارے اپ ڈیٹ حاصل کریں گے، نئے منصوبے پر عمل درآمد کا آغاز اسی ماہ سے ہو گا، چیف جسٹس عالیہ نیلم نے نئے منصوبے کا ٹاسک ایڈیشنل رجسٹرار آئی ٹی جمال احمد کو سونپ دیا ہے۔

لاہور ہائیکورٹ پاکستان کی واحد ہائیکورٹ ہو گی جہاں اس سہولت کا آغاز ہو گا، چیف جسٹس لاہور ہائیکورٹ کے ویژن کے مطابق سائلین اور وکلاء کی مشکلات کو کم کرنے کیلئے خصوصی ٹیمیں اقدامات کر رہی ہیں ۔

معروف قانون دان احسن بھون نے دنیا نیوز سے گفتگو کرتے ہوئے کہا کہ چیف جسٹس لاہور ہائیکورٹ کے اقدامات قابل تعریف ہیں، آئی ٹی سے استفادہ کر کے ہی سائلین کو بروقت انصاف کی فراہمی یقینی بنانے کا خواب کو پایہ تکمیل تک پہنچایا جا سکے گا ۔

ان کا کہنا تھا کہ سائلین اکثر شکایات کرتے تھے کہ ان کو بار بار عدالتوں کے چکر لگوائے جاتے ہیں لیکن اب سائلین کی مشکلات بھی ختم ہو جائیں گی اور سائلین کو اپنے کیسز کی معلومات کے لیے بار بار عدالتوں میں نہیں آنا پڑے گا، یہ اقدام نہ صرف سائلین بلکہ وکلاء کیلئے بھی فائدہ مند ہو گا۔

اس متعلق ایڈووکیٹ سپریم کورٹ چودھری نصیر کمبوہ کا کہنا تھا پنجاب کی تاریخ میں پہلی خاتون چیف جسٹس کا اعزاز بھی جسٹس مس عالیہ نیلم کے پاس ہے اور بطور چیف جسٹس سائلین کی مشکلات کو ختم کرنے اور وکلا ءکی فلاح و بہبود کیلئے تاریخی اقدامات کرنے کا اعزاز بھی چیف جسٹس عالیہ نیلم کے پاس ہے۔