(ویب ڈیسک) سینئراداکارہ سلمیٰ ظفر عاصم نے انکشاف کیا ہے کہ انہوں نے اپنے شوہرعاصم کو دوسری لڑکیوں سے دوستیاں رکھنے کے بجائے دوسری شادی کی اجازت خود دی تھی۔

حال ہی میں اداکارہ سلمیٰ ظفر عاصم ایک نجی پوڈکاسٹ میں شریک ہوئیں جس دوران انہوں نے اپنی نجی اور پیشہ ورانہ زندگی کے کئی رازوں سے پردہ اٹھایا۔

اپنی شادی کے حوالے سے اداکارہ سلمیٰ ظفر نے بتایا کہ میری شادی 18 سال سے بھی پہلے ہوگئی تھی، انٹر کے امتحان کا نتیجہ بھی نہیں آیا تھا حتیٰ کہ شناختی کارڈ بھی شادی کے بعد بنوایا، میرے شوہر اورمجھ میں 5 سال کا فرق ہے، 2 بیٹیاں اورایک بیٹا ہے، درحقیقت ساس نے گھر کو لے کر چلنا سکھایا، آج جو کچھ بھی ہوں ساس کی وجہ سے ہوں۔

شوہر کی دوسری شادی کے سوال پر سلمیٰ ظفرعاصم نے بتایا کہ جب عاصم کی دوستیوں کے قصے مجھ تک پہنچے تو شروع کے 3 ماہ بہت مشکل گزرے، بھوک پیاس ختم ہوگئی لیکن اس کے بعد سسر سے گفتگو کی اور شوہر کی دوسری شادی کا فیصلہ کر لیا۔

اداکارہ کا کہنا تھا کہ میں نے عاصم سے کہا آپ کو دوستیوں کے بجائے نکاح کر لینا چاہیے، شوہر کی شادی کیلئے بچوں کو بھی میں نے خود منایا، عاصم کے ایک حادثے کے بعد میں نے بچوں سے کہا کہ اگر وہ اپنے والد کو قبر کے بجائے اپنے ساتھ دیکھنا چاہتے ہیں تو ان کی شادی کیلئے راضی ہو جائیں، جس کے بعد بیٹے نے مجھے کہا کہ اگر میں عاصم  کی شادی کے بعد نہ روؤں تو وہ  راضی ہے جس کے بعد شوہر کی دوسری شادی ہوگئی۔

سلمیٰ ظفر کے مطابق اس کے بعد سوتیلے بیٹے کو بھی اپنا بیٹا سمجھ کر پیار دیا، آج میری 3 نہیں 4 اولادیں ہیں، بچوں میں بھی سگے بہن بھائیوں جیسی محبت ہے۔

Subscribe Lahore News on YouTube

Install our App