(لاہور نیوز) وزیراعلیٰ پنجاب مریم نواز شریف کی سربراہی میں 10 رکنی وفد چین روانہ ہو گیا۔

وفد میں سینئر صوبائی وزیر مریم اورنگ زیب، صوبائی وزیر اطلاعات عظمیٰ بخاری، وزیر ٹرانسپورٹ بلال اکبر خان، وزیر زراعت عاشق کرمانی شامل ہیں، چیف سیکرٹری پنجاب زاہد اختر زمان، سیکرٹری خزانہ مجاہد شیر دل، سیکرٹری ماحولیات راجہ جہانگیر انور، سٹاف آفیسر کیپٹن ریٹائرڈ علی اعجاز اور دیگر بھی وفد کا حصہ ہیں۔

مریم نواز شریف کا دورہ چین 15 دسمبر تک جاری رہے گا، چین کی حکمران کمیونسٹ پارٹی کے ڈیپارٹمنٹ آف سینٹرل کمیٹی کی جانب سے مریم نواز شریف کو چین دورے کی دعوت دی گئی تھی، وزیراعلیٰ پنجاب کے لئے بیجنگ، شنگھائی، شن ژین اور گوانگ ژو کے دوروں کا بھی خصوصی انتظام کیا گیا ہے، ان کی سی پی سی کے انٹرنیشنل ڈیپارٹمنٹ کے وزیر لیوجیان چاؤ سے ملاقات ہو گی، نائب وزیر محترمہ سن حیان وزیراعلیٰ پنجاب کے اعزاز میں ظہرانہ دیں گی۔

مریم نواز شریف کی سی پی سی کی مرکزی قیادت، ماحولیات کے وزیر سے بھی ملاقاتیں ہوں گی، وزیراعلیٰ پنجاب شی جی تان ہسپتال کا دورہ کریں گی جہاں ان کو چین میں صحت عامہ کے نظام پر بریفنگ دی جائے گی، وہ بیجنگ میونسپل کمیشن آف ٹرانسپورٹ کا دورہ کریں گی، وزیر اعلیٰ پنجاب مریم نواز شریف سائنس پارک، ماحولیاتی بہتری کی ٹیکنالوجی، آئی ٹی اور جدید سائنسی طریقوں کے استعمال سے متعلق اداروں کا بھی دورہ کریں گی، درآمدی اشیا کی نمائش میں شرکت کریں گی۔

وزیراعلیٰ مریم نواز شریف چین کے ایک پرائمری سکول کا دورہ کریں گی جہاں ان کو چین میں تعلیمی نظام پر بریفنگ دی جائے گی، پنجاب چائنا ڈنر، پنجاب انویسٹمنٹ کانفرنس بھی دورے کے شیڈول میں شامل ہے، وہ ہوائی ٹیکنالوجیز فیکٹری کا دورہ بھی کریں گی، چین کی حکمران جماعت اور پاکستان مسلم لیگ (ن) میں باہمی تعاون بڑھانے پر بات چیت ہو گی، چین اور صوبہ پنجاب میں اشتراک عمل اور معاشی تعاون کے امکانات پر بھی پیش رفت متوقع ہے۔

Follow Lahore News on Facebook

Install our App