آئی سی سی چیمپئنز ٹرافی لاہور پہنچا دی گئی

11-23-2024

(لاہور نیوز) آئی سی سی چیمپئنز ٹرافی کو کراچی سے لاہور پہنچا دیا گیا۔

ذرائع کے مطابق آئی سی سی چیمپئنز ٹرافی کا لاہور میں ٹور فائنل نہیں، چیمپئنز ٹرافی پی سی بی ہیڈکوارٹر پہنچائی جائے گی، اگلے مرحلے میں چیمپئنز ٹرافی افغانستان جائے گی۔ گزشتہ روز آئی سی سی چیمپئنز ٹرافی کو کراچی کے مختلف مقامات پر  لے جایا گیا تھا، بدھ سے شروع ہونے والے آئی سی سی چیمپئنز ٹرافی کا تین روزہ سفر کراچی میں مکمل ہونے کے بعد اب ٹرافی کو لاہور لایا گیا ہے، کراچی میں ٹرافی کا ایک فوٹو شوٹ مزار قائد پر ہوا، ٹرافی کو کے ایم سی کی تاریخی مرکزی عمارت بھی لے جایا گیا جہاں میئر کراچی مرتضیٰ وہاب اور صوبائی وزیر ناصر حسین شاہ نے ٹرافی کا استقبال کیا اور تصاویر بھی بنوائیں، اس تاریخی عمارت پر بھی ٹرافی کا فوٹو شوٹ ہوا۔ واضح رہے کہ آئی سی سی ابھی تک چیمپئنز ٹرافی کا شیڈول فائنل نہ کر سکا، انٹرنیشنل کرکٹ کونسل (آئی سی سی) شیڈول کے لئے بھارتی کرکٹ بورڈ (بی سی سی آئی) اور پاکستان کرکٹ بورڈ (پی سی بی) سے رابطے میں ہے، آئی سی سی بھارتی ٹیم کے پاکستان میں کھیلنے کے حوالے سے ممبر بورڈز سے مشاورت کر رہا ہے، مشاورت کے بعد آئی سی سی چیمپئنز ٹرافی کے شیڈول کا اعلان کرے گا۔ چیمپئنز ٹرافی 2025 کے معاملے پر بھارت بے جا ضد اور پاکستان سخت اصولی موقف پر قائم ہے، بھارت چیمپئنز ٹرافی کا انعقاد ہائبرڈ ماڈل پر کرانے پر بضد ہے جبکہ پی سی بی ایونٹ کا انعقاد مکمل طور پر پاکستان میں کرانے کا خواہاں ہے۔