عمران مدینہ ننگے پاؤں جا کر آئے تو باجوہ کو فون آنے لگے آپ کسے لے آئے؟ بشریٰ بی بی

11-21-2024

(لاہور نیوز) بانی پی ٹی آئی کی اہلیہ بشریٰ بی بی نے دعویٰ کیا ہے کہ عمران خان جب مدینہ ننگے پاؤں گئے اور واپس آئے تو جنرل باجوہ کو کالز آنا شروع ہو گئیں، باجوہ کو کہا گیا کہ یہ آپ کس شخص کو لے کر آئے ہیں۔

بشریٰ بی بی نے اپنے ویڈیو بیان میں کہا کہ جنرل (ر) قمر جاوید باجوہ (سابق آرمی چیف ) کو کہا گیا کہ یہ آپ کس شخص کو  لے کر آئے ہیں، ہمیں ایسے لوگ نہیں چاہئیں، باجوہ کو کہا گیا ہم تو ملک میں شریعت ختم کرنے لگے ہیں اور آپ ایسے شخص کو  لے کر آئے۔ اپنے ویڈیو پیغام میں بشریٰ بی بی نے کہا کہ تب سے ہمارے خلاف گند ڈالنا شروع کر دیا گیا، میرے خلاف گند ڈالا گیا، بانی پی ٹی آئی کو یہودی ایجنٹ کہنا شروع کیا گیا، 24 نومبر کو ہونیوالے احتجاج کے حوالے سے بشریٰ بی بی نے کہا کہ بانی پی ٹی آئی نے پوری قوم کو 24 نومبر کو نکلنے کی کال دی ہے، بانی پی ٹی آئی نے ہر طبقے کو اس احتجاج کا حصہ بننے کا کہا ہے۔ بشریٰ بی بی نے کہا کہ کہا جا رہا ہے کہ 24 نومبر کی تاریخ تبدیل کر دی جائے، 24 نومبر کی تاریخ کسی صورت تبدیل نہیں ہو گی، جب تک بانی پی ٹی آئی خود تاریخ بدلنے کا اعلان نہیں کرتے، انہوں نے کہا کہ کسی بھی قانون میں کسی کو پُرامن احتجاج سے نہیں روکا جا سکتا، بانی پی ٹی آئی باہر آکر کسی صورت بدلہ نہیں لیں گے۔