ملکی تاریخ کا پہلا 'چیف منسٹر ڈائیلسز پروگرام کارڈ' شروع کرنے کا فیصلہ

11-19-2024

(لاہور نیوز) ملکی تاریخ کا پہلا ''چیف منسٹر ڈائیلسز پروگرام کارڈ'' شروع کرنے کا فیصلہ کر لیا گیا، وزیراعلیٰ مریم نواز شریف نے باقاعدہ منظوری دے دی۔

وزیراعلیٰ پنجاب مریم نواز شریف کی زیر صدارت خصوصی اجلاس ہوا، اجلاس میں ہیلتھ پروگرام اور پراجیکٹس پر پیشرفت کا جائزہ لیا گیا، محکمہ صحت کی کارکردگی کے تعین کے لئے کے پی آئی مقرر کرنے پر اتفاق ہوا۔ اجلاس میں نواز شریف کینسر ہسپتال پر پیش رفت کی رپورٹ پیش کی گئی، پی آئی سی ٹو اور نواز شریف انسٹی ٹیوٹ آف کارڈیالوجی سرگودھا کی زیر تکمیل پراجیکٹ پر بھی رپورٹ پیش کی گئی۔ بریفنگ میں بتایا گیا کہ دیگر صوبوں کے مریض بھی مفت ڈائیلسز کی سہولت سے فیض یاب ہو رہے ہیں، پنجاب سے فری ادویات سندھ، بلوچستان اور دیگر صوبوں میں جا رہی ہیں، وزیراعلیٰ نے ملتان میں ڈائیلسز مریضوں میں ایڈز پھیلنے کے واقعہ پر سخت برہمی کا اظہار کرتے ہوئے 24 گھنٹے میں رپورٹ طلب کر لی۔ وزیراعلیٰ مریم نواز شریف نے ڈائیلسز کے مریض کے علاج کے لئے فنڈز 10 لاکھ روپے تک بڑھا دیئے، پنجاب میں امراض گردہ میں مبتلا ہر مریض کیلئے ساڑھے آٹھ لاکھ ڈائیلسز اور ڈیڑھ لاکھ ٹیسٹ وغیرہ کے لئے مختص کئے گئے ہیں، ڈائیلسز مریضوں کے مفت ادویات اور ٹیسٹ یقینی بنانے کی ہدایت بھی کر دی گئی۔ اجلاس میں وزیراعلیٰ نے مریضوں کا ڈائیلسز ہر صورت جاری رکھنے کی ہدایت کی، پنجاب میں مزید ڈائیلسز یونٹ قائم کرنے پر اصولی اتفاق بھی ہوا، پنجاب ہیلتھ کیئر کمیشن کو ڈائیلسز سینٹر میں ایس او پیز پر عمل درآمد یقینی بنانے کی ہدایت کی گئی، پنجاب ہیلتھ کیئر کمیشن کو صوبہ بھر میں ڈائیلسز سینٹرز کی کڑی مانیٹرنگ کا حکم دیا گیا۔  وزیراعلیٰ مریم نواز  نے پی آئی سی ٹو کو سٹیٹ آف آرٹ ہسپتال بنانے کی ہدایت کی، انہوں نے کہا ڈائیلسز کے مریضوں میں ایڈز پھیلنا افسوسناک ہی نہیں، شرمناک بھی ہے، فنڈز نہ ہونے کے عذر پر ڈائیلسز رکنا افسوسناک ہے، جاری رہنا چاہئے، امراض قلب کے لئے جدید ترین ٹیکنالوجی، آلات اور میڈیسن لائی جائیں، سپیشلسٹ ڈاکٹرز کی جدید ترین ٹریننگ کرائی جائے، ماسٹر ٹرینر تعینات کئے جائیں۔