جماعت اسلامی نے 26 ویں آئینی ترمیم سپریم کورٹ میں چیلنج کر دی

11-04-2024

(لاہور نیوز) جماعت اسلامی پاکستان کی جانب سے 26 ویں آئینی ترمیم کو سپریم کورٹ میں چیلنج کر دیا گیا۔

امیر جماعت اسلامی پاکستان حافظ نعیم الرحمان  نے 26 ویں آئینی ترمیم کے خلاف عدالت عظمیٰ میں درخواست دائر کی، درخواست وکیل عمران شفیق کے ذریعے دائر کی گئی جس میں وفاق سمیت چاروں صوبوں کو فریق بنایا گیا ہے۔ درخواست میں موقف اپنایا گیا کہ 26 ویں آئینی ترمیم بنیادی حقوق کے خلاف ہے، آئینی ترمیم بنیادی آئینی ڈھانچے اور متعدد آئینی شقوں کی خلاف ورزی ہے۔ دائر درخواست میں استدعا کی گئی ہے کہ 26 ویں آئینی ترمیم کالعدم قرار دی جائے اور یہ بھی قرار دیا جائے کہ چیف جسٹس پاکستان کا تقرر سنیارٹی کے مطابق ہو گا، پارلیمانی کمیٹی کی جانب سے چیف جسٹس کا تقرر کالعدم قرار دیتے ہوئے نئے جوڈیشل کمیشن کی تشکیل بھی معطل کی جائے۔