انٹرا پارٹی الیکشن نظرثانی کیس : پی ٹی آئی کی لارجر بینچ تشکیل دینے کی درخواست

10-19-2024

(لاہور نیوز) سپریم کورٹ میں تحریک انصاف نے انٹراپارٹی الیکشن نظرثانی کیس میں کم سے کم پانچ رکنی لارجر بینچ تشکیل دینے کی نئی درخواست دائر کر دی۔

سپریم کورٹ میں دائر درخواست میں مؤقف اختیار کیا گیا ہے کہ تحریک انصاف کے اِنٹراپارٹی انتخابات سے متعلق کیس 21 اکتوبر کو مقرر ہے، کیس میں آئینی تشریح کا نکتہ موجود ہے، پہلے کیس سنتے ہوئے بینچ نے ایسا اعتراض غلط خارج کیا، آئینی اعتراض پر سماعت کے لئے بینچ کی تشکیل قانونی نہیں تھی۔ درخواست میں کہا گیا ہے کہ الیکشن کمیشن متاثرہ فریق بن کر پارٹی کےخلاف عدالت نہیں جا سکتا تھا، تحریک انصاف کی درخواست میں مخصوص نشستوں کے فیصلے کا بھی ذکر کیا گیا ہے ، الیکشن کمیشن کے کنڈکٹ پر فیصلے میں مشاہدہ موجود ہیں۔ دائر درخواست میں عدالت سے استدعا کی گئی ہے کہ بینچ کی تشکیل کیلئے پریکٹس اینڈ پروسیجر ایکٹ کمیٹی کے تحت لارجر بینچ بنایا جائے، لارجر بینچ میں کم سے کم 5 یا ترجیحی بنیادوں پر 8 ججز کو رکھا جائے۔