ماہرین کا خون کے مخصوص گروپ کا فالج کے خطرات سے تعلق کا انکشاف

10-12-2024

(ویب ڈیسک)ماہرین کا کہنا ہے کہ خون کا اے گروپ رکھنے والے افراد میں 60 برس کی عمر سے قبل فالج ہونے کے امکانات زیادہ ہوتے ہیں۔

محققین کی تحقیق کے مطابق خون کی اقسام ہمارے ریڈ بلڈ سیلز کی سطح پر موجود مختلف کیمیاء کو ظاہر کرتی ہیں،ان خون کے گروپس میں سب سے معروف اے اور بی ہیں جن کو ایک ساتھ بطور اے بی پیش کیا جا سکتا ہے۔ انفرادی طور پر ان کی شناخت اے یا بی اور اگر یہ موجود نہ ہوں تو خون کی شناخت بطور او گروپ کی جاتی ہے۔ خون کی ان بڑی اقسام میں بھی ، ان میں موجود جینز میں ہونے والے متغیرات کے سبب باریک تبدیلیاں رُونما ہوتی ہیں۔تحقیق میں محققین نے اے 1 سب گروپ کے جین اور فالج کے ابتدائی خطرات کے درمیان واضح تعلق کو دریافت کیا تھا۔تحقیق میں محققین نے 48 جینیاتی مطالعات سے حاصل ہونے والے ڈیٹا کو اکٹھا کیا۔ اس تحقیق میں اندازاً 17 ہزار فالج سے متاثرہ جبکہ تقریباً 6 لاکھ غیر متاثرہ افراد کا مطالعہ کیا گیا۔ ان تمام افراد کی عمر 18 سے 59 برس کے درمیان تھے۔ تحقیق پر معلوم ہوا کہ 2  مواقع ایسے ہیں جو فالج کے ابتدائی خطرات سے مضبوط تعلق رکھتے ہیں۔ ان میں ایک وہ جگہ ہے جہاں خون کی قسم کا تعین کرنے والے جینز ہوتے ہیں۔بعد ازاں بلڈ ٹائپ جین کی مخصوص اقسام کے دوسرے تجزیے میں معلوم ہوا کہ وہ افراد جن کے جینوم اے گروپ کے متغیر سے کوڈڈ تھے ان کے 60 برس کی عمر سے پہلے فالج سے متاثر ہونے کے امکانات دیگر اقسام کے خون رکھنے والے افراد کے مقابلے میں 16 فی صد زیادہ تھے۔