وزیر اعظم کی مولانا فضل الرحمان کو بلا مقابلہ جے یوآئی کا صدر منتخب ہونے پر مبارکباد

09-29-2024

(لاہور نیوز) وزیر اعظم محمد شہباز شریف نے مولانا فضل الرحمان کو جمعیت علمائے اسلام (ف) کا پانچ سال کیلئے بلا مقابلہ صدر منتخب ہونے پر مبارکباد پیش کی۔

وزیر اعظم کے دفتر سے جاری کردہ اعلامیہ کے مطابق شہباز شریف نے کہا ہے کہ مولانا فضل الرحمان کی سربراہی میں جے یو آئی (ف) ہمیشہ عوام کی بہترین نمائندگی کرتی آئی ہے۔ ان کا کہنا تھا کہ مولانا فضل الرحمان کے جے یو آئی (ف) کے صدر کی حیثیت سے انتخاب سے جمہوری اقدار کو فروغ ملے گا، ملک میں پارلیمان کی بالادستی کے قیام میں مولانا فضل الرحمان کا انتہائی اہم کردار ہے۔ وزیر اعظم  نے کہا کہ ہمیں امید ہے کہ مولانا فضل الرحمان کی سربراہی میں جمیت علمائے اسلام (ف) ملک میں جمہوریت کی بالا دستی اور فروغ کے لیے بہترین کام کرے گی۔ اعلامیہ میں محمد  شہباز شریف کا مزید کا کہنا تھا کہ مولانا فضل الرحمان کی قیادت اور وژن بلاشبہ جمعیت علمائے اسلام کو مزید بلندیوں کی طرف لے جائے گی، وزیر اعظم  نے مولانا غفور حیدری کو بھی جمعیت علمائے اسلام (ف) کا جنرل سیکرٹری منتخب ہونے پر مبارک باد دی۔