پی ٹی آئی کا آج احتجاج، راولپنڈی میں دفعہ 144 نافذ، لیاقت باغ سیل

09-28-2024

(لاہور نیوز) پاکستان تحریک انصاف کے احتجاج کے پیش نظر راولپنڈی میں دفعہ 144 نافذ کردی گئی جبکہ لیاقت باغ کے باہر بھی کنٹینرز لگا دیئے گئے۔

لیاقت باغ کے گیٹ کو رکاوٹیں کھڑی کر کے اور خاردار تاریں لگا کر مکمل طور سیل کر دیا گیا جبکہ مری روڈ کے اطراف میں بھی کنٹینرز کھڑے کئے گئے ہیں، مری روڈ سے لیاقت باغ جانے والے راستے بھی کنٹینرز لگا کر بند کردیئے گئے۔ ذرائع نے بتایا ہے کہ مری روڈ کو فیض آباد کے مقام پر کنٹینر رکھ کر بلاک کردیا گیا، ملازمین اور کاروباری افراد کو شدید دشواری کا سامنا کرنا پڑ رہا ہے جبکہ راولپنڈی میں آج موبائل سروس بھی جزوی طور پر بند رکھی جائے گی۔ پی ٹی آئی کے ممکنہ احتجاج کے باعث راولپنڈی صدر سٹیشن تا آئی جے پی سٹیشن تک میٹرو بس سروس مکمل طور پر بند رہے گی جبکہ اسلام آباد کی حدود میں آئی جے پی سٹیشن سے پاک سیکرٹریٹ تک میٹرو بس سروس فعال رہے گی۔ ادھر راولپنڈی سے 50 کلومیٹر دور مری گھوڑا گلی کے مقام کو ٹرک لگا کر بند کر دیا گیا، مری موٹروے کو بھی عام ٹریفک کے لئے بند کر دیا گیا، سڑکوں کی بندش کے باعث مال گاڑیاں بھی پھنس گئیں جس سے کروڑوں روپے کا سامان خراب ہونے کا خدشہ ہے۔ مری سے اسلام آباد جانے والے راستوں کی بندش کے باعث شہری مری میں محصور ہوکر رہ گئے، مری ٹریفک پولیس کی جانب سے شہریوں کو متبادل راستے بھی فراہم نہ کیے جا سکے جس کے باعث شہریوں کو شدید مشکلات کا سامنا ہے۔