پولیس کا کریک ڈاؤن، 2 روز میں پی ٹی آئی کے 80 سے زائد کارکنان گرفتار

09-20-2024

(لاہور نیوز) پولیس نے تحریک انصاف کے رہنماؤں اور کارکنوں کے خلاف کریک ڈاؤن کے دوران 2 روز میں 80 سے زائد افراد کو حراست میں لے لیا۔

ذرائع کے مطابق پولیس کی جانب سے کارکنوں کو گھروں، دکانوں اور ڈیروں پر چھاپے مار کر حراست میں لیا گیا، پولیس نے شاہدرہ،کوٹ لکھپت، مناواں، کینٹ ، ہربنس پورہ سے ورکرز کو حراست میں لیا۔ دوسری جانب لاہور پولیس نے تحریک انصاف کے 42 رہنماؤں اور کارکنوں کو نظر بند کروانے کے لئے محکمہ داخلہ کو مراسلہ بھجوا دیا، مراسلہ اقبال ٹاؤن ڈویژن پولیس کی جانب سے بھجوایا گیا۔ پولیس کی جانب سے بھجوائی گئی فہرست میں میاں اسلم اقبال، میاں محمود الرشید کے بیٹے میاں حسن، مہر واجد، وقاص امجد اور ندیم بارا سمیت 42 افراد کے نام شامل ہیں، فہرست میں خواتین ورکرز کے نام بھی شامل کئے گئے ہیں۔ مراسلے میں کہا گیا ہے کہ فہرست میں شامل افراد افواج پاکستان کیخلاف انتشار پھیلاتے ہیں، لوگوں کو نجی وسرکاری املاک کو نقصان پہنچانے کی ترغیب دیتے ہیں، ان افراد کی وجہ سے لاء اینڈ آرڈر کے مسائل پیدا ہونے کا خدشہ ہے اس لئے  ان کے 90 یوم کے لئے نظر بندی کے احکامات جاری کئے جائیں۔