عمران خان پر پنجاب میں درج مقدمات کی تفصیلات سامنے آ گئیں

09-05-2024

(لاہور نیوز) بانی پی ٹی آئی عمران خان پر پنجاب میں درج مقدمات کی تفصیلات سامنے آ گئیں۔

بانی پی ٹی آئی پر پولیس، ایف آئی اے، اینٹی کرپشن اور نیب میں درج مقدمات اور انکوائریز کی رپورٹ سامنے آگئی ہے، پولیس رپورٹ کے مطابق بانی پی ٹی آئی پر پنجاب کے مختلف اضلاع میں کل 48 مقدمات درج ہیں۔ عمران خان پر لاہور میں پنجاب پولیس کی جانب سے 18 مقدمات درج کیے گئے ہیں، بانی پی ٹی آئی پر شیخوپورہ میں سات مقدمہ درج ہیں۔ رپورٹ میں بتایا گیا ہے کہ سابق وزیراعظم پر گوجرانوالہ میں ایک، راولپنڈی میں 13 اور اٹک میں 2 مقدمات درج ہیں، بانی پی ٹی آئی پر فیصل آباد میں 5، سرگودھا اور میانوالی میں ایک ایک مقدمہ درج ہے۔ پولیس رپورٹ کے مطابق عمران خان کے خلاف ایف ائی اے میں ایک اور اینٹی کرپشن پنجاب میں دو انکوائریاں زیر التوا ہیں، بانی پی ٹی آئی پر نیب کے تین کیسز زیر التوا ہیں، عمران خان کیخلاف 190 ملین پاؤنڈ اور توشہ خانہ کی دو انکوائریاں زیر التوا ہیں۔