ہانیہ عامر ہمسایہ ملک میں بھی مقبولیت،بھارتی صحافی نے اداکارہ سے انٹرویو کیلئے وقت مانگ لیا

09-04-2024

(ویب ڈیسک) معروف اداکارہ ہانیہ عامرکی جانداری اداکاری کی بدولت پڑوسی ملک بھارت میں بڑھتی مقبولیت کے باعث بھارتی صحافی نے انٹریو کیلئے وقت مانگ لیا۔

ہانیہ عامر کا شمار اُن پاکستانی اداکاراؤں میں ہوتا ہے جن کے ڈرامے سرحد پار بھارت میں بھی بڑے ہی شوق سے دیکھے جاتے ہیں، اداکارہ کے نئے ڈرامہ سیریل ‘کبھی میں کبھی تُم’ کو بھارت میں اس قدر مقبولیت مل رہی ہے کہ اب ہانیہ کے بھارتی مداحوں میں بھی اضافہ ہورہا ہے۔ بالی ووڈ شخصیات کے انٹرویوز کرنے والے معروف بھارتی صحافی فریدون شہریار نے حال ہی میں ہانیہ عامر کا انٹرویو لینے کی خواہش ظاہر کی ہے۔فریدون شہریار نے ہانیہ عامر کی پوسٹ پر کمنٹ کرتے ہوئے اُن کے ڈرامہ سیریل ‘کبھی میں کبھی تُم’ میں اُن کی اداکاری کی تعریف کی۔ اس کے ساتھ ہی بھارتی صحافی نے ہانیہ عامر سے مخاطب ہوتے ہوئے کہا کہ میں نے آپ کے ساتھ انٹرویو کرنا ہے، برائے مہربانی بتائیں کہ یہ کس طرح ممکن ہوسکتا ہے؟بھارتی صحافی کے کمنٹ پر ہانیہ عامر کا تو ردعمل سامنے نہیں آیا تاہم اداکارہ کے مداحوں نے اُنہیں انٹرویو کے لیے رضامند ہونے کے مشورے دیے۔