وزیراعظم کی ہدایت پر اولمپیئن ارشد ندیم کے ڈیرے کو بجلی کی فراہمی کا حکم

08-12-2024

(ویب ڈیسک) وزیراعظم شہباز شریف کی ہدایت پر اولمپکس میں گولڈ میڈل جیتنے والے کھلاڑی ارشد ندیم کے ڈیرے پر بجلی فراہم کرنے کا حکم دے دیا ہے۔

میپکو نے وزیراعظم کی ہدایت پر گولڈ میڈلسٹ ارشد ندیم کے چک 101/15 ایل میاں چنوں میں بجلی سسٹم اپ گریڈ کرنے کے لئے مٹیریل پہنچا دیا ہے۔ آج 12 اگست کو میپکو کچا کھوہ اور کنسٹرکشن سب ڈویژنوں کی ٹیم ارشد ندیم کے ڈیرے تک بجلی فراہم کرنے کے لئے پولز، ٹرانسفارمر اور لائن نصب کرے گی۔ ارشد ندیم کی آبائی رہائش گاہ چک 101/15 ایل کی آبادی 200 گھروں پر مشتمل ہے اور گاؤں میں بجلی دستیاب ہے، گاؤں میں بجلی فراہمی کے نظام کی اپ گریڈیشن کے لئے مزید 4 پولز اور 100 کے وی اے کا ایک ٹرانسفارمر نصب کیا جا رہا ہے۔ چیف ایگزیکٹو آفیسر میپکو انجینئر ناصر ایاز گرمانی کی ہدایت پر چیف انجینئر ڈویلپمنٹ میپکو سیف اللہ سرانی، ایس ای خانیوال سرکل ساجد حسین گوندل سمیت دیگر افسران نے گولڈ میڈلسٹ ارشد ندیم سے ان کی رہائش گاہ پر ملاقات کی۔ میپکو افسران نے ارشد ندیم کو جیولین مقابلوں میں گولڈ میڈل جیتنے پر مبارکباد دی اور وفاقی وزیر، میپکو چیف کا بجلی سسٹم کی اپ گریڈیشن کا پیغام پہنچایا۔ میپکو ترجمان کے مطابق ارشد ندیم کے ڈیرے پر بجلی فراہم کرنے کے لئے پولز اور ٹرانسفارمر کی تنصیب آج شام تک مکمل کر لی جائے گی۔