سیمنٹ ڈیلرز کا بھی وِد ہولڈنگ ٹیکس کیخلاف آج سے ہڑتال کا اعلان

07-14-2024

(ویب ڈیسک) آٹا ملز کے بعد سیمنٹ ڈیلرز ایسوسی ایشن پاکستان نے بھی وِد ہولڈنگ ٹیکس مسترد کردیا اور آج سے ہڑتال کا اعلان کر دیا۔

سیمنٹ ڈیلرز ایسوسی ایشن نے ہڑتال کا اعلان لاہور چیمبر میں منعقدہ اجلاس میں کیا۔ رہنماؤں کا کہنا تھا کہ ٹیکس ہدف بڑھا کر تاجروں اور صنعتکاروں کیلئے کاروبار کے مواقع کم کر دیے گئے، جتنا زیادہ ٹیکس لگے گا، لوگ اتنا زیادہ ٹیکس چوری کی طرف جائیں گے۔ ایسوسی ایشن کے مطابق سیمنٹ کی بوری کی قیمت 500 روپے ہونی چاہیے تھی جو 1500 روپے تک پہنچ گئی ہے، سیمنٹ ڈیلرز ایسوسی ایشن کے پاس ہڑتال پر جانے کے سوا کوئی چارہ نہیں ہے۔ ایسوسی ایشن کے عہدیداروں نے کہا کہ آج سے کوئی سیمنٹ ڈیلر کمپنیوں سے سیمنٹ نہیں اٹھائے گا۔ دوسری جانب حکومت سے مذاکرات کے بعد پاکستان فلور ملز ایسوسی ایشن نے ہڑتال 10 روز کیلئے مؤخرکردی ہے۔