پاکستانی ٹک ٹاکرز کی 2 کروڑ سے زائد ویڈیوز ڈیلیٹ

07-09-2024

(ویب ڈیسک) ٹک ٹاک نے پاکستانی صارفین کی 2 کروڑ سے زائد ویڈیوز ڈیلیٹ کر دیں۔

اسی حوالے سے ٹک ٹاک نے 2024 کی پہلی سہ ماہی کیلئے کمیونٹی گائیڈ لائنز کے نفاذ کی رپورٹ جاری کی ہے۔ غیر ملکی خبر رساں ادارے کی رپورٹ کے مطابق ٹک ٹاک انتظامیہ کا کہنا ہے کہ ٹک ٹاک پر روزانہ کروڑوں ویڈیوز اَپ لوڈ ہوتی ہیں جن کے مواد کی جانچ پڑتال کمیونٹی گائیڈ لائنز کے اصولوں کے تحت کی جاتی ہے۔ رپورٹ کے مطابق جنوری سے مارچ 2024 کے دوران دنیا بھر میں 16 کروڑ 69 لاکھ 97 ہزار 307 ویڈیوز کو کمیونٹی گائیڈ لائنز کی خلاف ورزی پر پلیٹ فارم سے ہٹایا گیا،یہ تعداد اس عرصے میں ٹک ٹاک پر پوسٹ کی جانے والی مجموعی ویڈیوز کے 0.9 فیصد کے برابر ہے۔ پاکستان میں اس عرصے کے دوران 2 کروڑ 2 لاکھ 7 ہزار سے زائد ویڈیوز کو ڈیلیٹ کیا گیا۔ اس سہ ماہی کے دوران ٹک ٹاک نے پہلی بار کمنٹ سیفٹی ٹولز استعمال کرتے ہوئے 97 کروڑ 64 لاکھ سے زائد تبصروں کو ڈیلیٹ اور فلٹر کیا، ٹک ٹاک نے 2 کروڑ 16 لاکھ 39 ہزار 414 ایسے اکاؤنٹس بھی پلیٹ فارم سے ہٹائے، جن کے بنانے والوں کی عمر 13 سال سے کم تھی۔