پاکستان پٹرولیم ڈیلرز کا 5 جولائی کا پٹرول پمپس بند رکھنے کا اعلان

07-03-2024

(ویب ڈیسک) چیئرمین پاکستان پٹرولیم ڈیلرز ایسوسی ایشن عبدالسمیع خان نے کہا ہے کہ 5 جولائی کو ہم اپنے پٹرول پمپس بند کر دیں گے۔

پاکستان پٹرولیم ڈیلرز ایسوسی ایشن (پی پی ڈی اے) نے بجٹ میں 0.5 فیصد ایڈوانس ٹرن اوور ٹیکس کے نفاذ کے خلاف 5 جولائی کو ملک گیر ہڑتال کا اعلان کیا ہے، حالانکہ حکومت نے اپنی غلطی تسلیم کرتے ہوئے اس متنازع ٹیکس کو واپس لینے کی یقین دہانی کرائی ہے۔ اسلام آباد میں پریس کانفرنس کرتے ہوئے عبدالسمیع خان نے کہا کہ دنیا میں کوئی ایسا طریقہ نہیں کہ نقصان میں پمپس چلائے جائیں، ڈبل ٹیکسیشن تو دنیا میں کہیں نہیں ہوتی، ہم ایک اہم مسئلے پر وزیر خزانہ سے ملے، ہم پر ایڈوانس ٹیکس کے نام سے 0.5 فیصد ٹیکس لگا دیا گیا ہے، پہلے سے ہمارا مارجن کم ہے جس کی وجہ سے ہم پریشان ہیں۔ عبدالسمیع خان کا کہنا تھا کہ اگر یہ ٹیکس لگایا جائے گا تو ہمارے پمپس بند ہو جائیں گے، ہم نے وزارت خزانہ سے کہا کہ ہمیں دیگر شعبوں کی طرح ڈیل نہ کیا جائے، اگر ہمارا کاروبار ختم ہو گا تو ہم سخت سے سخت قدم اٹھائیں گے۔ چیئرمین پاکستان پٹرولیم ڈیلرز ایسوسی ایشن نے کہا کہ ایران سے تیل سمگل ہو رہا ہے، ہماری شنوائی نہیں ہو رہی، ہم نے ہر ادارے سے رجوع کیا کسی نے بات نہیں سنی۔ ان کا مزید کہنا ہے کہ چاہتے ہیں ایران سے معاہدہ کر لیا جائے اور ایرانی تیل پر ٹیکس لگائیں، سمگلنگ روکنا حکومت کی ذمہ داری ہے۔