انشااللہ بانی پی ٹی آئی بہت جلد رہا ہوں گے: بیرسٹر گوہر، شبلی فراز

06-03-2024

(لاہور نیوز) پاکستان تحریک انصاف کے چیئرمین بیرسٹر گوہر اور مرکزی رہنما شبلی فراز نے کہا ہے کہ آج لوگوں نے بارش کا پہلا قطرہ دیکھا، عنقریب قوم باران رحمت دیکھے گی، انشااللہ بانی پی ٹی آئی بہت جلد رہا ہوں گے۔

میڈیا سے گفتگو کرتے ہوئے چیئرمین پی ٹی آئی بیرسٹر گوہر نے کہا کہ آج پاکستان کے 25 کروڑ عوام کے لئے خوشی کا دن ہے، آج عوام نے دیکھا کہ انصاف کا علم بلند ہوا ہے۔ انہوں نے کہا کہ ایک ناحق اور بےبنیاد کیس کا خاتمہ ہوا ہے، اس کیس کی وجہ سے بانی پی ٹی آئی نے 10 ماہ جیل میں گزارے۔ بیرسٹر گوہر نے کہا کہ ہم نے ہمیشہ عدلیہ کا احترام کیا، عدلیہ سے آج بھی امید لگائے بیٹھے ہیں کہ انصاف کا بول بالا ہو گا، یہ سارے انتقام پر مبنی سیاسی کیس انشااللہ ختم ہوں گے۔ اس موقع پر گفتگو کرتے ہوئے شبلی فراز نے کہا کہ انصاف کا تازہ جھونکا ہمیں ملا ہے، امید ہے مخصوص نشستوں میں بھی ہمیں انصاف ملے گا۔