اداکارہ طاہرہ نقوی کی آج 42 ویں برسی منائی جا رہی ہے

06-02-2024

( لاہور نیوز) پاکستانی ڈراموں اور فلموں میں ایک سے بڑھ کر ایک عمدہ کردار ادا کرنے والی اداکارہ طاہرہ نقوی کو اپنے پرستاروں سے بچھڑے 42 برس بیت گئے، ان کی آج برسی منائی جا رہی ہے۔

منی مدھو بالا کہلانے والی طاہرہ نقوی سیالکوٹ میں پیدا ہوئیں، اداکارہ نے شوبز کی دنیا میں قدم رکھا تو پی ٹی وی پر عظمیٰ گیلانی، خالدہ ریاست، روحی بانو و دیگر فنکاروں کا ڈنکا بجتا تھا، طاہرہ نقوی نے ان سب میں رہ کر اپنا نام بنایا۔ طاہرہ نقوی کا پہلا ڈرامہ ’زندگی بندگی‘ تھا، انہوں نے دہلیز، وارث، احساس، ایک حقیقت ایک افسانہ سمیت 50 ڈراموں میں اداکاری کے جوہر دکھائے، ’زندگی بندگی‘ ڈرامے میں طاہرہ نقوی کا ڈائیلاگ ’’چھوٹی سی گڑیا چھوٹی رہ گئی، ممی کی گود میں سوتی رہ گئی‘‘ نے خوب شہرت پائی۔ اداکارہ طاہرہ نقوی چند فلموں میں بھی جلوہ گر ہوئیں جن میں بدلتے موسم، میاں بیوی راضی و دیگر شامل تھیں۔ 1981میں طاہرہ نقوی کی طبیعت اس قدر ناساز ہوئی کہ پھر بہتر نہ ہو سکی، ساتھی فنکاروں نے بیرون ملک ان کے علاج کیلئے رقم بھی جمع کی، تاہم اداکارہ 2 جون 1982 کو خالق حقیقی سے جا ملیں۔