حج آپریشن: پی آئی اے کے ذریعے 4398 عازمین حجاز مقدس پہنچ گئے

05-16-2024

(لاہور نیوز) قومی ایئرلائن پی آئی اے کا قبل از حج آپریشن جاری ہے، 7 روز کے دوران پی آئی اے کی کل 20 پروازیں آپریٹ ہوئیں جس کے ذریعے 4398 عازمین حج حجاز مقدس پہنچے۔

ان پروازوں میں 14 پروازیں براہ راست مدینہ منورہ کے لئے روانہ ہوئیں، 6 پروازیں براستہ کراچی اپنی منزل مقصود پر پہنچیں۔ پی آئی اے کی حج پروازیں 23 مئی تک مدینہ منورہ کے لئے آپریٹ ہو رہی ہیں جبکہ 24 مئی سے 10 جون تک جدہ کے لئے حج پروازیں چلائی جائیں گی۔ پی آئی اے کا قبل از حج آپریشن 190 پروازوں پر مشتمل ہو گا جن میں 170 براہ راست پروازیں اور 20 پروازیں براستہ کراچی آپریٹ ہوں گی۔ ترجمان پی آئی اے کے مطابق براستہ کراچی پروازوں میں 15 پروازیں کوئٹہ سے اور 5 پروازیں سکھر سے چلائی جائیں گی۔