پولیس اور وکلاء میں تصادم کا مقدمہ درج، پاکستان بار کونسل کی آج ہڑتال

05-09-2024

(لاہور نیوز) گزشتہ روز لاہور کے علاقے جی پی او چوک میں پولیس اور وکلاء کے درمیان تصادم کا مقدمہ درج کرلیا گیا۔

ذرائع کے مطابق واقعہ کا مقدمہ انسپکٹر جاوید کی مدعیت میں تھانہ پرانی انارکلی میں درج کیا گیا، مقدمے میں روڈ بلاک، تشدد، کارسرکار میں مداخلت کی دفعات شامل کی گئی ہیں۔ ایف آئی آر کے مطابق وکلاء کی بڑی تعداد پولیس پر حملہ آور ہوئی، وکلاء کے حملے میں ایس ایچ او نیو انارکلی، ایس ایچ او اچھرہ سمیت 5 اہلکار زخمی ہوئے۔ پولیس کے تشدد اور احتجاجی وکلاء کی گرفتاریوں کے خلاف پاکستان بار کونسل نے آج ملک گیر ہڑتال کا اعلان کررکھا ہے ۔ یاد رہے کہ 8 مئی کو عدالتوں کی منتقلی اور وکلاء پر دہشتگری کے مقدمات کے خلاف لاہور ہائی کورٹ کے باہر لاہور بار ایسوسی ایشن نے ریلی نکالی تھی۔ مطالبات کی منظوری کے لیے وکلاء نے لاہور ہائی کورٹ کی عمارت میں داخل ہونے کی کوشش کی جس پر مظاہرین اور پولیس کے درمیان تصادم شروع ہوگیا۔