نامزد گورنر پنجاب سلیم حیدر خان کی تقریب حلف برداری ایک بار پھر ملتوی

05-07-2024

(لاہور نیوز) گورنر پنجاب کی حلف برداری کی تقریب ایک بار پھر ملتوی کردی گئی، پیپلز پارٹی کے رہنما سلیم حیدر خان نے آج شام 6 بجے گورنر پنجاب کے عہدے کا حلف اٹھانا تھا۔

قبل ازیں پیپلز پارٹی کی جانب سے نامزد گورنر پنجاب سردار سلیم حیدر نے 2 روز قبل عہدے کا حلف اٹھانا تھا تاہم موجودہ گورنر بلیغ الرحمان کی ملک میں غیر موجودگی کی وجہ سے حلف برداری ملتوی کر دی گئی، مسلم لیگ ن نے پی پی قیادت سے حلف برداری ملتوی کرنے کی درخواست کی تھی۔ تاہم گورنر پنجاب کی تقریب حلف برداری ایک بار پھر ملتوی کر دی گئی ہے، موجودہ گورنر محمد بلیغ الرحمان کی وطن واپسی کے بعد 10 مئی کو حلف برداری کی تقریب گورنر ہاؤس میں منعقد ہو گی، چیف جسٹس لاہور ہائی کورٹ نئے گورنر سے حلف لیں گے، حلف برداری کی تقریب میں چیئرمین پیپلز پارٹی بلاول بھٹو زرداری اور خاتون اول آصفہ بھٹو بھی شرکت کریں گی۔ علاوہ ازیں پاکستان پیپلز پارٹی کے رہنما، جیالے، صوبائی کابینہ کے ممبران، مسلم لیگ (ن) کے رہنماؤں سمیت دیگر افراد حلف برداری کی تقریب میں شریک ہوں گے۔