وزیرِ تعلیم سے آسٹرین سفیر کی ملاقات، تعلیمی مسائل پر تبادلہ خیال

04-28-2024

(لاہور نیوز) صوبائی وزیرِ تعلیم رانا سکندر حیات سے پاکستان میں تعینات آسٹرین سفیر اینڈریا وک نے ملاقات کی ہے۔

ملاقات میں پنجاب کو در پیش تعلیمی مسائل اور ترجیحات پر غور کیا گیا جبکہ تعاون  کے فروغ اور  باہمی دلچسپی کے امور پر بھی تبادلہ خیال ہوا۔ وزیرِ تعلیم پنجاب رانا سکندر حیات نے ملاقات کے دوران گفتگو  کرتے ہوئے کہا کہ آسٹریا کے تعلیمی تجربات سے استفادہ کرتے ہوئے پنجاب میں اصلاحات کریں گے، آسٹریا 98 فیصد شرح خواندگی کے ساتھ ہمارے لیے ایک مثال ہے۔ ملاقات میں دونوں فریقین کے درمیان فنی تعلیم، ٹیچرز ٹریننگ اور دیگر مسائل سے نمٹنے کے لیے مشترکہ اقدامات پر اتفاق کیا گیا۔ پنجاب اور آسٹریا کے درمیان طلبہ ایکسچینج پروگرام، آئی ٹی سٹی اور ٹیکنیکل پروگرامز کے آغاز پر بھی غور کیا گیا۔